ఢిల్లీలోని చాందినీ చౌక్ బీజేపీ ఎంపీ ప్రవీణ్ ఖండేవాల్ ఢిల్లీ పేరును **’ఇంద్రప్రస్థ’**గా మార్చాలని డిమాండ్ చేస్తూ కేంద్ర హోం మంత్రి అమిత్ షాకు శనివారం లేఖ రాశారు. ఢిల్లీ చరిత్ర పాండవుల కాలంతో ముడిపడి ఉందని, భారతీయ నాగరికత ఆత్మ, సంస్కృతి, వారసత్వం, సంప్రదాయాలు ‘ఇంద్రప్రస్థ’ పేరుతో ముడిపడి ఉన్నాయని ఆయన తన లేఖలో పేర్కొన్నారు.
ఖండేవాల్ లేఖలో, పాత ఢిల్లీ రైల్వే స్టేషన్ పేరును **’ఇంద్రప్రస్థ జంక్షన్’**గా, ఢిల్లీ విమానాశ్రయం పేరును ‘ఇంద్రప్రస్థ అంతర్జాతీయ విమానాశ్రయంగా’ మార్చాలని కూడా సూచించారు. అంతేకాకుండా, పాండవుల విగ్రహాలను ఢిల్లీలోని ప్రధాన ప్రదేశాలలో ఏర్పాటు చేయాలని ఆయన డిమాండ్ చేశారు. దీని ద్వారా యువ తరానికి పాండవుల సంస్కృతి, నాగరికత గురించి తెలుస్తుందని ఆయన అన్నారు. మహాభారత కాలంలో పాండవులు యమునా నది ఒడ్డున ఇంద్రప్రస్థ రాజధానిని స్థాపించారని ఆయన గుర్తు చేశారు.
ఇదిలా ఉండగా, నాలుగు రోజుల క్రితం మాజీ కేంద్ర మంత్రి విజయ్ గోయల్ కూడా ఢిల్లీ పేరుపై అభ్యంతరం వ్యక్తం చేశారు. ఆంగ్లంలో ‘Delhi’ అని రాసినా, దేశం మొత్తం దీనిని ‘దిల్లీ’ అని పలుకుతుందని, ఉచ్చారణ, గుర్తింపు గౌరవార్థం ఆంగ్లంలో కూడా దీనిని ‘Dilli’ గా రాయాల్సిన సమయం ఆసన్నమైందని అన్నారు. ఢిల్లీ పేరు మార్పు అనేది కేవలం ఒక చర్య కాదని, ఇది మన ఆత్మ, సంప్రదాయం, చరిత్రతో ముడిపడి ఉన్న ముందడుగు అని ఆయన పేర్కొన్నారు.
