తాడిమర్రి శివంపల్లి ఎంపీపీ పాఠశాలలో ఘనంగా మెగా పేరెంట్-టీచర్ సమావేశం

(Yes9tv )
విద్యార్థుల సమగ్ర అభివృద్ధికి తల్లిదండ్రులు–ఉపాధ్యాయుల సమన్వయం ఎంతో అవసరం: బీజేపీ ఓబీసీ జిల్లా ఎగ్జిక్యూటివ్ సభ్యుడు ఆరవేటి గంగాధర్
తాడిమర్రి మండలం, శివంపల్లి:
తాడిమర్రి మండలం శివంపల్లి గ్రామంలోని ఎంపీపీ ప్రాథమిక పాఠశాలలో ప్రభుత్వం నిర్వహించిన మెగా పేరెంట్-టీచర్ మీటింగ్ (Mega PTM) కార్యక్రమం ఘనంగా జరిగింది. ఈ కార్యక్రమంలో మాజీ డీలర్ అల్లే ఆదినారాయణ రెడ్డి, శ్రీ సత్యసాయి జిల్లా బీజేపీ ఓబీసీ ఎగ్జిక్యూటివ్ సభ్యుడు ఆరవేటి గంగాధర్, పాఠశాల ఉపాధ్యాయురాలు దీక్షి అలివేలు, అంగన్‌వాడీ టీచర్ సుగుణ, మినీ అంగన్‌వాడీ టీచర్ వెంకటనారాయణమ్మ, తల్లిదండ్రులు తదితరులు పాల్గొన్నారు.
ఈ సందర్భంగా ఆరవేటి గంగాధర్ మాట్లాడుతూ, విద్యార్థుల భవిష్యత్తు నిర్మాణంలో తల్లిదండ్రులు, ఉపాధ్యాయులు సమిష్టిగా పనిచేయాల్సిన అవసరం ఉందన్నారు. పిల్లల చదువుతో పాటు క్రమశిక్షణ, నైతిక విలువలు, వ్యక్తిత్వ వికాసంపై కూడా ప్రత్యేక శ్రద్ధ చూపాలని సూచించారు. ప్రభుత్వం నిర్వహిస్తున్న మెగా పీటీఎం వంటి కార్యక్రమాలు పాఠశాల–తల్లిదండ్రుల మధ్య అనుబంధాన్ని మరింత బలోపేతం చేస్తాయని పేర్కొన్నారు.
అలాగే ప్రతి విద్యార్థి క్రమం తప్పకుండా పాఠశాలకు హాజరై నాణ్యమైన విద్యను అభ్యసించేలా తల్లిదండ్రులు బాధ్యత తీసుకోవాలని కోరారు. ప్రభుత్వ పాఠశాలల్లో అందిస్తున్న విద్యా సౌకర్యాలు, మౌలిక వసతులను సద్వినియోగం చేసుకోవాలని సూచించారు. విద్యాభివృద్ధికి సమాజంలోని ప్రతి ఒక్కరూ తమవంతు సహకారం అందించాలని పిలుపునిచ్చారు.
అనంతరం ఉపాధ్యాయులు విద్యార్థుల విద్యా పురోగతి, హాజరు, అభ్యాస సామర్థ్యాలపై తల్లిదండ్రులతో చర్చించి, వారి అభిప్రాయాలు, సూచనలు స్వీకరించారు. కార్యక్రమం విజయవంతంగా నిర్వహించిన ఉపాధ్యాయ బృందాన్ని, తల్లిదండ్రులను అతిథులు అభినందించారు.