తాడిమర్రిలో మొహరం ఉత్సవాలు: పచ్చని చెట్లను నరకవద్దు.. అటవీశాఖ ముందస్తు విజ్ఞప్తి!

తాడిమర్రి( yes9tv )మొహరం ఉత్సవాల్లో పచ్చని చెట్లను నరకవద్దు – అటవీశాఖ విజ్ఞప్తి
తాడిమర్రి, జూన్ 9: రాబోయే మొహరం ఉత్సవాల సందర్భంగా తాడిమర్రి ప్రాంతంలో ఉత్సవాలు నిర్వహించే పెద్దలు, కమిటీ సభ్యులు మరియు భక్తులందరికీ అటవీశాఖ ముఖ్య విజ్ఞప్తి చేసింది. ఉత్సవాల్లో భాగంగా నిర్వహించే అగ్నిగుండాల కోసం పచ్చని చెట్లను నరికి ఉపయోగించే ఆనవాయితీని తగ్గించాలని అధికారులు కోరారు.
జిల్లా కలెక్టర్ మరియు జిల్లా అటవీశాఖ అధికారి ఆదేశాల మేరకు, ప్రస్తుత పర్యావరణ పరిస్థితులను దృష్టిలో ఉంచుకుని ఎక్కడా పచ్చి చెట్లను నరకకుండా, పచ్చదనానికి హాని కలగకుండా మొహరం ఉత్సవాలను నిర్వహించాలని సూచించారు. భక్తుల మనోభావాలు, సంప్రదాయాలకు భంగం కలగకుండా అగ్నిగుండాలను ఎండు కట్టలు, కంపకట్టలు మరియు ఇతర పొడి ఇంధన సామగ్రితో మాత్రమే వెలిగించుకోవాలని అటవీశాఖ అధికారులు కోరారు.
అదేవిధంగా, ఈ అవగాహన కార్యక్రమంలో పోలీస్ శాఖతో పాటు ఇతర ప్రభుత్వ శాఖల అధికారులు కూడా సహకరించాలని విజ్ఞప్తి చేశారు. మొహరం ఉత్సవాలు జరిగే ప్రతి గ్రామంలో ప్రజలకు పర్యావరణ పరిరక్షణపై అవగాహన కల్పించాలని సూచించారు.
ఈ కార్యక్రమంలో అటవీశాఖ సిబ్బంది, ఫారెస్ట్ బీట్ అధికారులు వెంకటరమణ, అక్కులప్ప, గిరీష్ పాల్గొన్నారు.
“పచ్చదనాన్ని కాపాడుతూ సంప్రదాయాలను కొనసాగిద్దాం” అనే సందేశంతో అటవీశాఖ ప్రజలకు పిలుపునిచ్చింది.