అనంతపురం జిల్లా, రాయదుర్గం.
అనంతపురం జిల్లా రాయదుర్గం పట్టణంలోని బళ్ళారి రోడ్డులో ఉన్న ఈద్గా వద్ద ముస్లిం సోదరులు ఎంతో భక్తిశ్రద్ధలతో బక్రీద్ (ఈద్-ఉల్-అధా) పండుగను ఘనంగా జరుపుకున్నారు. తెల్లవారుజామున ప్రత్యేక నమాజులు నిర్వహించి దేశంలో శాంతి, సౌభ్రాతృత్వం, ప్రజల సంక్షేమం కోసం ప్రార్థనలు చేశారు. పెద్ద సంఖ్యలో ముస్లిం భక్తులు ఈద్గా వద్దకు చేరుకుని పండుగ వేడుకల్లో పాల్గొన్నారు.
ఈ సందర్భంగా సర్ ఖాజీ మొహమ్మద్ సైఫుల్లా మాట్లాడుతూ బక్రీద్ పండుగ త్యాగం, విశ్వాసం, దానధర్మాలకు ప్రతీక అని పేర్కొన్నారు. రంజాన్ తరువాత ముస్లిం సమాజం అత్యంత భక్తిశ్రద్ధలతో జరుపుకునే పవిత్ర పండుగ ఇదేనని తెలిపారు. దైవానికి కావాల్సింది మనుషుల చిత్తశుద్ధి, సంకల్ప శుద్ధి మాత్రమేనని, మానవాళి విశ్వాసాన్ని పరీక్షించేందుకు భగవంతుడు జీవితంలో వివిధ రూపాల్లో పరీక్షలు ఇస్తాడని అన్నారు.
ఇస్లాం మతం ప్రేమ, కరుణ, సహనం, పరస్పర సహకారం వంటి గొప్ప విలువలను బోధిస్తుందని చెప్పారు. సమాజంలో పేదలకు సహాయం చేయడం, అవసరమైన వారికి తోడ్పాటు అందించడం ప్రతి ఒక్కరి బాధ్యత అని సూచించారు. అనంతరం ముస్లిం సోదరులు ఆలింగనం చేసుకుని బక్రీద్ శుభాకాంక్షలు తెలుపుకున్నారు.
పండుగ సందర్భంగా పోలీసులు ప్రత్యేక భద్రతా ఏర్పాట్లు చేపట్టి ఎలాంటి అవాంఛనీయ సంఘటనలు జరగకుండా చర్యలు తీసుకున్నారు. స్థానిక ప్రజాప్రతినిధులు, మత పెద్దలు, ప్రముఖులు వేడుకల్లో పాల్గొని ముస్లిం సోదరులకు బక్రీద్ శుభాకాంక్షలు తెలిపారు.
