టాలీవుడ్ సెన్సేషనల్ స్టార్ విజయ్ దేవరకొండ మరియు నేషనల్ క్రష్ రష్మిక మందన్నల వివాహ వేడుక రాజస్థాన్లోని ఉదయ్పూర్ వేదికగా అత్యంత వైభవంగా జరిగింది. ‘గీత గోవిందం’, ‘డియర్ కామ్రేడ్’ చిత్రాలతో వెండితెరపై మాయ చేసిన ఈ జంట, ఇప్పుడు నిజ జీవితంలోనూ ఒక్కటయ్యారు. వివాహం అనంతరం విజయ్ దేవరకొండ తన ఇన్స్టాగ్రామ్లో పెళ్లి ఫోటోలను పంచుకుంటూ, తన భార్య రష్మికపై ఉన్న ప్రేమను తెలియజేస్తూ పెట్టిన ఎమోషనల్ పోస్ట్ ప్రస్తుతం సోషల్ మీడియాలో వైరల్ అవుతోంది.
తమ పెళ్లికి అభిమానులు ముద్దుగా పిలుచుకునే ‘విరోష్’ (ViRosh) అనే పేరునే ఖరారు చేయడం విశేషం. రష్మిక తన జీవితంలో ఎంత ముఖ్యమైనదో వివరిస్తూ విజయ్ స్పందించారు. “నా రోజు అసంపూర్ణంగా అనిపించాలన్నా, భోజనం తృప్తిగా ఉండాలన్నా తను పక్కన ఉండాల్సిందే. ఎక్కడ ఉన్నా ‘ఇల్లు’ అనే ప్రశాంతత కలగాలంటే తను కావాలనిపించింది. అందుకే నా ప్రాణ స్నేహితురాలినే నా భార్యగా చేసుకున్నాను” అని విజయ్ పేర్కొన్నారు. తన బెస్ట్ ఫ్రెండ్నే జీవిత భాగస్వామిగా పొందడం పట్ల ఆయన తన సంతోషాన్ని అక్షర రూపంలో ఆవిష్కరించారు.
ఉదయ్పూర్లోని ప్రసిద్ధ ‘మెమెంటోస్ బై ఐటీసీ హోటల్స్, ఏకాయ’ వేదికగా ఈ వివాహ వేడుక జరిగింది. ఇరు కుటుంబ సభ్యులు, అత్యంత సన్నిహితుల సమక్షంలో సంప్రదాయబద్ధంగా జరిగిన ఈ పెళ్లికి చిత్ర పరిశ్రమకు చెందిన కొద్దిమంది మిత్రులు మాత్రమే హాజరయ్యారు. పెళ్లికి ముందు జరిగిన హల్దీ, సంగీత్ వేడుకల ఫోటోలు కూడా నెట్టింట సందడి చేస్తున్నాయి. ఎట్టకేలకు ఈ స్టార్ జంట ఒక్కటవడంతో ఇటు విజయ్ అభిమానులు, అటు రష్మిక ఫ్యాన్స్ పండగ చేసుకుంటున్నారు.
