తెలంగాణలో గత బీఆర్ఎస్ ప్రభుత్వ హయాంలో జరిగినట్లుగా భావిస్తున్న ఫోన్ ట్యాపింగ్ వ్యవహారం మరోసారి రాజకీయ దుమారం రేపుతోంది. సీపీ సజ్జనార్ నేతృత్వంలోని ప్రత్యేక దర్యాప్తు బృందం (SIT) ఈ కేసులో దూకుడు పెంచి, మాజీ ముఖ్యమంత్రి కేసీఆర్ మరియు బీఆర్ఎస్ కార్యనిర్వాహక అధ్యక్షుడు కేటీఆర్లకు నోటీసులు ఇవ్వాలని నిర్ణయించినట్లు తెలుస్తోంది. ఇప్పటికే ఈ కేసులో అరెస్టయిన అధికారులు ఇచ్చిన వాంగ్మూలాలు, కీలక ఆధారాల నేపథ్యంలో సిట్ ఈ దిశగా అడుగులు వేస్తోంది. ఇటీవల కవిత కూడా తన భర్త ఫోన్ ట్యాప్ అయిందని చేసిన వ్యాఖ్యలు ఈ కేసుకు మరింత ప్రాధాన్యతను చేకూర్చాయి.
ఈ పరిణామాలపై కేంద్ర హోం శాఖ సహాయ మంత్రి బండి సంజయ్ ఘాటుగా స్పందించారు. కేసీఆర్, కేటీఆర్లకు నోటీసులు ఇవ్వడాన్ని ఆయన స్వాగతించారు. “ఎస్ఐబీ (SIB) వ్యవస్థను కేసీఆర్ కుటుంబం తన స్వంత ప్రయోజనాల కోసం వాడుకుంది. సొంత కూతురు, అల్లుడి ఫోన్లతో పాటు నా ఫోన్ను కూడా ట్యాప్ చేశారు. ఈ సమాచారాన్ని అడ్డుపెట్టుకుని కాంట్రాక్టర్లను, రాజకీయ నాయకులను బ్లాక్ మెయిల్ చేసి కోట్లు వసూలు చేశారు” అని బండి సంజయ్ తీవ్ర ఆరోపణలు చేశారు. ఈ కేసులో కేవలం నోటీసులతో సరిపెట్టకుండా, లోతైన విచారణ జరిపి దోషులను కఠినంగా శిక్షించాలని ఆయన డిమాండ్ చేశారు.
ప్రస్తుతం ఈ కేసు అనేక మలుపులు తిరుగుతూ ఒక టీవీ సీరియల్లా సాగుతోందని బండి సంజయ్ ఎద్దేవా చేశారు. విచారణాధికారులపై ఎలాంటి రాజకీయ ఒత్తిడి లేకుండా, వారికి పూర్తి స్వేచ్ఛనిచ్చి ఈ కుట్ర వెనుక ఉన్న అసలు సూత్రధారులను బయటపెట్టాలని ఆయన రేవంత్ ప్రభుత్వాన్ని కోరారు. స్వయంగా కవిత కూడా ఈ వ్యవహారంలో బాధితురాలినని పేర్కొనడంతో, రేవంత్ ప్రభుత్వం కేసీఆర్ కుటుంబాన్ని ఏ విధంగా ఇరుకున పెడుతుందనేది ఇప్పుడు రాష్ట్ర రాజకీయాల్లో ఆసక్తికరంగా మారింది.
