సౌదీ అరేబియాలో ఉపాధి నిమిత్తం వెళ్లిన కరీంనగర్ జిల్లాకు చెందిన వ్యక్తి గుండెపోటుతో మృతి చెందారు. మృతుడు గన్నేరువరం మండలం, హనుమాజిపల్లెకు చెందిన వీరయ్యగా గుర్తించారు. ఆయన కొన్నాళ్లుగా సౌదీలోని ఒక కంపెనీలో కారు డ్రైవర్గా పనిచేస్తున్నారు. ఈ రోజు కారును పార్క్ చేసి, అందులోనే విశ్రాంతి తీసుకుంటున్న సమయంలో వీరయ్యకు హఠాత్తుగా గుండెపోటు వచ్చింది.
ఈ సంఘటన గమనించిన స్థానికులు, కంపెనీలోని ఇతర కార్మికులు వెంటనే వైద్యులకు సమాచారం అందించారు. అయితే, వారు వచ్చి పరిశీలించే సమయానికి వీరయ్య అప్పటికే మృతి చెందినట్లు నిర్ధారించారు. వెంటనే తోటి కార్మికులు ఈ విషాద వార్తను ఫోన్ ద్వారా వీరయ్య కుటుంబ సభ్యులకు చేరవేశారు.
మరణించిన వీరయ్యకు భార్య, ఇద్దరు కుమారులు ఉన్నారు. విదేశాల్లో ఉపాధి కోసం వెళ్లిన తమ కుటుంబ పెద్ద హఠాత్తుగా గుండెపోటుతో మృతి చెందడం ఆ కుటుంబంలో తీవ్ర విషాదాన్ని నింపింది. వీరయ్య భౌతికకాయాన్ని స్వదేశానికి తరలించేందుకు ఏర్పాట్లు జరుగుతున్నాయి.
