నాలుగు కిలోల వెండితో రూపొందించిన శ్రీ పోతలయ్య స్వామి పంచలోహ–వెండి ప్రతిమకు ఘన ఊరేగింపు

Yes9tv (తాడిమర్రి)చిల్ల కొండయ్యపల్లిలో నాలుగు కిలోల వెండితో రూపొందించిన శ్రీ పోతలయ్య స్వామి పంచలోహ–వెండి ప్రతిమకు ఘన ఊరేగింపు
చిల్ల కొండయ్యపల్లి, తాడిమర్రి మండలం:
తాడిమర్రి మండలంలోని చిల్ల కొండయ్యపల్లి గ్రామంలో గ్రామదైవమైన శ్రీ పోతలయ్య స్వామివారి పంచలోహ–వెండి నూతన ప్రతిమను భక్తిశ్రద్ధలతో ప్రతిష్ఠాపనకు సిద్ధం చేశారు. సుమారు నాలుగు కిలోల వెండితో అత్యంత వైభవంగా రూపొందించిన ఈ ప్రతిమను గ్రామస్థుల సహకారంతో తయారు చేయించారు.
శనివారం రాత్రి స్వామివారికి సంప్రదాయబద్ధంగా దిష్టి బొట్టు పెట్టి ప్రత్యేక పూజలు నిర్వహించారు. అనంతరం ఆదివారం సాయంత్రం స్వామివారి ప్రతిమను గ్రామంలోని అన్ని దేవాలయాల వద్దకు తీసుకెళ్లి ప్రత్యేక పూజలు నిర్వహిస్తూ గ్రామమంతా భక్తిశ్రద్ధలతో ఘనంగా ఊరేగించారు. ఈ సందర్భంగా భక్తులు “జై శ్రీ పోతలయ్య స్వామి” నినాదాలతో గ్రామాన్ని ఆధ్యాత్మిక వాతావరణంతో నింపారు.
గ్రామ పెద్దలు, మహిళలు, యువకులు, భక్తులు పెద్ద సంఖ్యలో పాల్గొని స్వామివారి ఆశీస్సులు పొందారు. కార్యక్రమం అనంతరం భక్తులకు తీర్థప్రసాదాలు పంపిణీ చేశారు. గ్రామంలో శాంతి, సుభిక్షం, సమృద్ధిగా వర్షాలు కురవాలని, పంటలు బాగా పండాలని, ప్రజలందరూ ఆయురారోగ్యాలతో ఉండాలని ప్రత్యేక ప్రార్థనలు నిర్వహించారు.
ఈ మహోత్సవాన్ని గ్రామ పెద్దలు, గ్రామస్తులు, ఆలయ కమిటీ సభ్యులు సంయుక్తంగా నిర్వహించారు. ముఖ్యంగా పిన్నపెద్ద మద్దినేని సీనప్ప గౌడ్, కొంకా పోతలయ్య, తలారి రెడ్డి ఆధ్వర్యంలో ఈ కార్యక్రమం అత్యంత వైభవంగా నిర్వహించబడింది. గ్రామ ప్రజల ఐకమత్యానికి నిదర్శనంగా నిలిచిన ఈ వేడుక విజయవంతంగా ముగిసింది.