మర్రిమాకులపల్లిలో వీఆర్వో కుళ్లాయప్ప కుటుంబాన్ని పరామర్శించిన ఆర్డీఓ రామభూపాల్ రెడ్డి..

yes9tv (తాడిమర్రి) మర్రిమాకులపల్లిలో వీఆర్వో కుళ్లాయప్ప కుటుంబాన్ని పరామర్శించిన ఆర్డీఓ రామభూపాల్ రెడ్డి
ప్రభుత్వం తరఫున రూ.25 వేల తక్షణ ఆర్థిక సాయం – కుటుంబానికి అండగా ఉంటామని భరోసా
శ్రీ సత్యసాయి జిల్లా ధర్మవరం రెవెన్యూ డివిజన్ పరిధిలోని తాడిమర్రి మండలంలో విధులు నిర్వహించిన పెద్దకొట్ల గ్రామ రెవెన్యూ అధికారి (వీఆర్వో) శ్రీ కుళ్లాయప్ప అనారోగ్య కారణాలతో శుక్రవారం రాత్రి మృతి చెందడం పట్ల ధర్మవరం రెవెన్యూ డివిజనల్ అధికారి (ఆర్డీఓ) ఓ. రామభూపాల్ రెడ్డి తీవ్ర దిగ్భ్రాంతి వ్యక్తం చేశారు.
శనివారం (01-08-2026) ఉదయం తాడిమర్రి మండలంలోని మర్రిమాకులపల్లి గ్రామానికి వెళ్లిన ఆర్డీఓ, మృతుడి నివాసానికి చేరుకుని కుటుంబ సభ్యులను పరామర్శించారు. కుళ్లాయప్ప చిత్రపటానికి పూలమాల వేసి నివాళులర్పించిన అనంతరం కుటుంబ సభ్యులకు ప్రగాఢ సానుభూతి తెలియజేస్తూ, ఈ విషాదాన్ని తట్టుకునే ధైర్యం కలగాలని ఆకాంక్షించారు.
ఈ సందర్భంగా అంత్యక్రియల ఖర్చుల నిమిత్తం ప్రభుత్వం తరఫున రూ.25,000లను ముందస్తు ఆర్థిక సహాయంగా అందజేశారు. ఈ క్లిష్ట సమయంలో ప్రభుత్వం వారి కుటుంబానికి అన్ని విధాలుగా అండగా ఉంటుందని, ప్రభుత్వ నిబంధనల మేరకు అందాల్సిన సంక్షేమ ప్రయోజనాలు, ఆర్థిక సహాయాన్ని అందించేందుకు చర్యలు తీసుకుంటామని భరోసా కల్పించారు.
వీఆర్వో కుళ్లాయప్ప తన విధి నిర్వహణలో ప్రజలకు అందుబాటులో ఉంటూ రెవెన్యూ సేవలను బాధ్యతాయుతంగా అందించారని, గ్రామ ప్రజలతో సత్సంబంధాలు కొనసాగిస్తూ నిజాయితీతో పనిచేసిన అధికారిగా గుర్తింపు పొందారని ఆర్డీఓ పేర్కొన్నారు. ఆయన ఆకస్మిక మరణం రెవెన్యూ శాఖకు తీరని లోటని, సహచర ఉద్యోగులు ఒక మంచి సహోద్యోగిని కోల్పోయారని విచారం వ్యక్తం చేశారు.
ఈ కార్యక్రమంలో తాడిమర్రి తహశీల్దార్, మండల రెవెన్యూ ఇన్‌స్పెక్టర్లు, వీఆర్వోలు, రెవెన్యూ శాఖ అధికారులు, సిబ్బంది, స్థానిక ప్రజాప్రతినిధులు, గ్రామ పెద్దలు, గ్రామస్తులు పాల్గొని కుళ్లాయప్పకు నివాళులర్పించారు. ఆయన ఆత్మకు శాంతి చేకూరాలని ఆకాంక్షిస్తూ కుటుంబ సభ్యులకు తమ ప్రగాఢ సానుభూతిని తెలియజేశారు.