తాడిమర్రిలో బీజేపీ “మన ఊరు – మన జెండా” కార్యచరణ: ప్రతి ఇంటిపై పార్టీ జెండా ఎగరాలి – హరీష్ బాబు పిలుపు.

బీజేపీని ప్రజల మధ్యకు తీసుకెళ్లే మహా ఉద్యమం – “మన ఊరు – మన జెండా”
ప్రతి ఇంటికి బీజేపీ… ప్రతి గ్రామానికి జెండా – తాడిమర్రిలో హరీష్ బాబు పిలుపు
తాడిమర్రి, మార్చి 30:
తాడిమర్రి మండల కేంద్రంలోని భారతీయ జనతా పార్టీ కార్యాలయంలో, రాష్ట్ర బీజేపీ ఆధ్వర్యంలో నిర్వహించబోయే “మన ఊరు – మన జెండా” కార్యక్రమాన్ని విజయవంతం చేసే దిశగా ఒక ముఖ్య సమావేశం జరిగింది. ఈ సమావేశానికి నియోజకవర్గ ఇన్‌చార్జ్ హరీష్ బాబు అధ్యక్షత వహించారు. మండల, గ్రామ స్థాయి పార్టీ నాయకులు, కార్యకర్తలు విస్తృతంగా పాల్గొన్నారు.
ఈ సందర్భంగా హరీష్ బాబు మాట్లాడుతూ, ఏప్రిల్ 6న భారతీయ జనతా పార్టీ ఆవిర్భావ దినోత్సవాన్ని పురస్కరించుకుని రాష్ట్రవ్యాప్తంగా చేపడుతున్న “మన ఊరు – మన జెండా” కార్యక్రమం సాధారణ కార్యక్రమం కాదని, ఇది గ్రామ స్థాయి నుంచి పార్టీని మరింత బలోపేతం చేసే మహత్తర ఉద్యమమని తెలిపారు.
ప్రతి గ్రామం, ప్రతి బూత్ కేంద్రంగా పార్టీని ప్రజలకు చేరువ చేసేలా కార్యాచరణ రూపొందించాలని ఆయన సూచించారు. కార్యకర్తలు ఇంటింటికీ వెళ్లి కేంద్ర ప్రభుత్వం అమలు చేస్తున్న సంక్షేమ, అభివృద్ధి పథకాలను ప్రజలకు వివరించడంతో పాటు, వారి సమస్యలను తెలుసుకుని పరిష్కారానికి కృషి చేయాలని పిలుపునిచ్చారు.
“ప్రతి ఇంటిపై బీజేపీ జెండా ఎగరాలి… ప్రతి హృదయంలో బీజేపీ ఆలోచన నాటాలి” అనే లక్ష్యంతో ఈ కార్యక్రమాన్ని పండుగ వాతావరణంలో నిర్వహించాలని ఆయన పేర్కొన్నారు. సేవా భావంతో ప్రజల మధ్య పనిచేసే కార్యకర్తల ద్వారానే పార్టీ మరింత బలపడుతుందని అన్నారు.
ఈ కార్యక్రమం ద్వారా గ్రామాల్లో పార్టీ ప్రభావం పెరగడమే కాకుండా, యువత, మహిళలు, రైతులను పెద్ద ఎత్తున ఆకర్షించే అవకాశముందని తెలిపారు. ప్రతి నాయకుడు, కార్యకర్త తన బాధ్యతను గుర్తించి కృషి చేస్తే ధర్మవరం నియోజకవర్గంలో బీజేపీ మరింత శక్తివంతంగా ఎదుగుతుందని విశ్వాసం వ్యక్తం చేశారు.
సమావేశంలో పాల్గొన్న నాయకులు కూడా తమ అభిప్రాయాలను వ్యక్తం చేస్తూ, కార్యక్రమాన్ని విజయవంతం చేసేందుకు సమన్వయంతో పనిచేయాలని నిర్ణయించారు. గ్రామ స్థాయిలో సమర్థవంతంగా అమలు చేయడానికి ప్రత్యేక కార్యాచరణ ప్రణాళికను సిద్ధం చేశారు.
ఈ సమావేశంలో జిల్లా ప్రధాన కార్యదర్శి సాకే ఓబులేష్, మండల అధ్యక్షుడు రామ్మోహన్, మండల ప్రధాన కార్యదర్శి ఆనంద్, భాస్కర్ నాయుడు, ఉపాధ్యక్షులు చంద్రబాబు, అనుగుత్తి రమణ, మార్కెట్ యార్డ్ డైరెక్టర్ కొంక నాగార్జున, పార్టీ సీనియర్ నాయకులు, కార్యకర్తలు తదితరులు పాల్గొన్నారు.