ప్రపంచ ఆర్థిక సదస్సులో భాగంగా ముఖ్యమంత్రి చంద్రబాబు నాయుడు యూఏఈ విదేశీ వాణిజ్య శాఖ మంత్రి డాక్టర్ థాని బిన్ అహ్మద్ అల్ జయేదీతో బుధవారం ప్రత్యేకంగా భేటీ అయ్యారు. ఈ సమావేశంలో ఆంధ్రప్రదేశ్లో ‘దుబాయ్ ఫుడ్ క్లస్టర్’ ఏర్పాటు చేయాలని చంద్రబాబు ప్రతిపాదించారు. రాష్ట్రంలో ఉన్న అపారమైన వ్యవసాయ, ఆక్వా, ఉద్యాన ఉత్పత్తులను ప్రాసెస్ చేసి అంతర్జాతీయ మార్కెట్లకు ఎగుమతి చేసేందుకు ఏపీ అత్యంత అనుకూలమైన ప్రదేశమని ఆయన వివరించారు. ముఖ్యంగా అగ్రిటెక్, ఫుడ్ టెక్, ఆక్వా టెక్నాలజీ రంగాల్లో యూఏఈ పెట్టుబడులకు ఉన్న అవకాశాలపై ఈ భేటీలో సుదీర్ఘంగా చర్చించారు.
ఆంధ్రప్రదేశ్లో మౌలిక సదుపాయాలైన పోర్టులు, విమానాశ్రయాలు, రైలు మరియు రోడ్డు నెట్వర్క్ లాజిస్టిక్స్కు ఎంతో ఊతమిస్తాయని సీఎం ఈ సందర్భంగా పేర్కొన్నారు. డీపీ వరల్డ్, షరాఫ్ గ్రూప్, ఏడీ పోర్ట్స్ వంటి అంతర్జాతీయ దిగ్గజ సంస్థలు ఏపీలో పారిశ్రామిక పార్కులు నెలకొల్పాలని ఆయన కోరారు. కేవలం ఫుడ్ ప్రాసెసింగ్ మాత్రమే కాకుండా, ఏపీలో అభివృద్ధి చేయనున్న స్పేస్ మరియు డ్రోన్ సిటీల నిర్మాణంలో కూడా యూఏఈ భాగస్వామ్యం కావాలని చంద్రబాబు ఆహ్వానించారు.
ఇంధన రంగంలో కూడా ఏపీ అపార అవకాశాలను అందిస్తోందని, 160 గిగావాట్ల గ్రీన్ ఎనర్జీ ఉత్పత్తిని లక్ష్యంగా పెట్టుకున్నామని సీఎం వివరించారు. ఈ రంగంలో పెట్టుబడులు పెట్టేందుకు యూఏఈకి చెందిన మజ్దార్, టాక్వా వంటి కంపెనీలు ముందుకు రావాలని కోరారు. ముఖ్యమంత్రి ప్రతిపాదనలపై యూఏఈ మంత్రి థాని బిన్ అహ్మద్ సానుకూలంగా స్పందించారు. ఏపీలో ఉన్న మౌలిక సదుపాయాలు, పెట్టుబడులకు ఉన్న అనుకూల వాతావరణాన్ని ఆయన ప్రశంసించారు. ఈ చర్చలు విజయవంతమైతే రాబోయే రోజుల్లో ఏపీలోకి భారీగా యూఏఈ పెట్టుబడులు వచ్చే అవకాశం ఉంది.
