జాతీయ విద్యా పరిశోధన సంస్ధ ఎన్సీఈఆర్టీ పాఠ్యపుస్తకాల్లో సిలబస్ తయారీ విషయంలో తీసుకుంటున్న నిర్ణయాలు ఇప్పటికే కాకరేపుతున్నాయి. కరోనా తర్వాత విద్యార్దులపై ఒత్తిడి తగ్గిస్తామనే పేరుతో పలు కీలక అధ్యయనాంశాల్ని సిలబస్ నుంచి తొలగిస్తున్న NCERT మరో వివాదాస్పద నిర్ణయం తీసుకుంది.
ఈసారి పదో తరగతి సిలబస్ నుంచి ప్రజాస్వామ్యంతో పాటు పలు అంశాల్ని తొలగిస్తూ నిర్ణయం తీసుకుంది.
ఎన్సీఈఆర్టీ పదో తరగతి సిలబస్ నుంచి ఆవర్తన పట్టిక, ప్రజాస్వామ్యం, శక్తి వనరులపై పాఠ్యాంశాలను తొలగించారు. విద్యార్థులపై భారాన్ని తగ్గించడానికి ఉద్దేశించిన హేతుబద్ధీకరణలో భాగంగా ఇప్పుడు ఈ అధ్యాయాలు తొలగించినట్లు ఎన్టీఈఆర్టీ తెలిపింది. ఈ ఏడాది 10వ తరగతి పాఠ్యాంశాల నుండి డార్విన్ పరిణామ సిద్ధాంతాన్ని తొలగించడం వివాదాస్పదమైంది. నేషనల్ కౌన్సిల్ ఆఫ్ ఎడ్యుకేషనల్ రీసెర్చ్ అండ్ ట్రైనింగ్ కొత్తగా విడుదల చేసిన పాఠ్యపుస్తకాల్లో ఆవర్తన పట్టికలోని అధ్యాయంతో సహా మరిన్ని కోతలు దర్శనమిచ్చాయి.
సైన్స్ పాఠ్యపుస్తకం నుండి తొలగించబడిన అంశాలలో పర్యావరణ సుస్థిరత, శక్తి వనరులపై అధ్యాయాలు కూడా ఉన్నాయి. తాజా సవరణ తర్వాత 10వ తరగతి విద్యార్థులకు ప్రజాస్వామ్యం, ప్రజాస్వామ్యానికి సవాళ్లు మరియు రాజకీయ పార్టీలపై పూర్తి అధ్యాయాలు కూడా తొలగించబడ్డాయి. కరోనావైరస్ మహమ్మారి నేపథ్యంలో విద్యార్థులపై భారాన్ని తగ్గించడం అత్యవసరమని NCERT చెబుతోంది.
అయితే, విద్యార్థులు ఇప్పటికీ ఈ సబ్జెక్టుల గురించి నేర్చుకునే అవకాశం ఉంది. కానీ వారు 11వ తరగతి, 12వ తరగతిలో సంబంధిత సబ్జెక్టును ఎంచుకుంటేనే ఇది సాధ్యం కానుంది. మన దేశంలో 10వ తరగతి సైన్స్ తప్పనిసరి సబ్జెక్ట్గా బోధించే చివరి సంవత్సరం ఇదే. చివరి రెండు సంవత్సరాల విద్యలో కెమిస్ట్రీని అభ్యసించడానికి ఎంచుకున్న విద్యార్థులు మాత్రమే ఆవర్తన పట్టిక గురించి నేర్చుకుంటారు.
