అనంతపురం జిల్లా బుక్కరాయసముద్రం
ఏకంగా ఎస్బీఐ ఏటీఎంనే ఎత్తుకెళ్లిన దొంగలు
అనంతపురం జిల్లా బుక్కరాయసముద్రంలో దొంగలు బరితెగించి ఏకంగా స్టేట్ బ్యాంక్ ఆఫ్ ఇండియా (ఎస్బీఐ) ఏటీఎం మిషన్ను ఎత్తుకెళ్లిన ఘటన తీవ్ర కలకలం రేపింది. తెల్లవారుజామున జరిగిన ఈ ఘటన స్థానికంగా భయాందోళనలకు గురిచేసింది. పోలీస్ స్టేషన్కు కేవలం వంద మీటర్ల దూరంలోనే ఈ చోరీ జరగడం భద్రతా వ్యవస్థపై ప్రశ్నలు లేవనెత్తుతోంది.
పోలీసుల వివరాల ప్రకారం, తాడిపత్రి ప్రధాన రహదారిపై ఉన్న ఎస్బీఐ ఏటీఎం కేంద్రాన్ని లక్ష్యంగా చేసుకున్న దుండగులు ముందుగా ఏటీఎం గది అద్దాలను ధ్వంసం చేశారు. అనంతరం మిషన్ను పూర్తిగా తొలగించి, అందులో అమర్చిన బ్యాటరీలు, ఇతర పరికరాలతో పాటు తీసుకెళ్లారు. ఘటన సమయంలో ఏటీఎంలో నగదు ఉన్నదా? ఎంత మొత్తం ఉందనే విషయంపై బ్యాంకు అధికారులు లెక్కలు పరిశీలిస్తున్నారు.
ఘటన సమాచారం అందుకున్న వెంటనే సీఐ సుబ్బరాయుడు, ఎస్సై రాంప్రసాద్ పోలీసు సిబ్బందితో కలిసి సంఘటనా స్థలాన్ని పరిశీలించారు. డాగ్ స్క్వాడ్, క్లూస్ టీమ్ సహాయంతో ఆధారాల సేకరణ చేపట్టారు. ఏటీఎం కేంద్రం పరిసర ప్రాంతాల్లోని సీసీ కెమెరాల ఫుటేజీలను పరిశీలిస్తూ నిందితుల కదలికలను గుర్తించే ప్రయత్నం చేస్తున్నారు.
ఇదిలా ఉండగా, దుండగులు ఎత్తుకెళ్లిన ఏటీఎం మిషన్ శింగనమల మండలం ఆకులేడు గ్రామ శివారులో గుర్తించారు. మిషన్ను అక్కడ పడేసి వెళ్లినట్లు పోలీసులు గుర్తించారు. నగదు దోచుకున్న తర్వాత ఆధారాలు చెరిపివేయాలనే ఉద్దేశంతో మిషన్ను అక్కడ వదిలేసి ఉండవచ్చని అనుమానిస్తున్నారు. ఆ ప్రాంతంలో కూడా పోలీసులు క్షుణ్ణంగా తనిఖీలు నిర్వహించి వేలిముద్రలు, ఇతర సాంకేతిక ఆధారాలను సేకరిస్తున్నారు.
ఈ ఘటనలో అంతర్జిల్లా దొంగల ముఠా ప్రమేయం ఉండవచ్చని పోలీసులు అనుమానిస్తున్నారు. ప్రత్యేక బృందాలను ఏర్పాటు చేసి పలు కోణాల్లో దర్యాప్తు చేపట్టారు. జిల్లాలోని ప్రధాన రహదారులు, టోల్ప్లాజాలు, సీసీటీవీ నెట్వర్క్ల ద్వారా నిందితుల జాడ కోసం గాలింపు కొనసాగుతోంది.
నిత్యం రద్దీగా ఉండే ప్రాంతంలో, అంతేకాకుండా పోలీస్ స్టేషన్ సమీపంలో జరిగిన ఈ సాహసోపేత చోరీ జిల్లా వ్యాప్తంగా చర్చనీయాంశంగా మారింది. నిందితులను త్వరలోనే పట్టుకుంటామని పోలీసులు తెలిపారు.
