ఇండియన్ క్రికెట్ టీమ్ వికెట్ కీపర్ రిషబ్ పంత్ గత శుక్రవారం తెల్లవారుఝామున ఘోర రోడ్డు ప్రమాదానికి గురైన విషయం తెలుసు కదా. తన కారులో ఢిల్లీ నుంచి హరిద్వార్ వెళ్తున్న క్రమంలో ఈ ప్రమాదం జరిగింది. ఇందులో పంత్ కారు పూర్తిగా మంటల్లో కాలిపోగా.. అతడు అదృష్టవశాత్తూ గాయాలతో బయటపడ్డాడు. డెహ్రాడూన్లోని ఓ ప్రైవేట్ హాస్పిటల్లో అతడు చికిత్స పొందుతున్నాడు. అతనికి ప్లాస్టిక్ సర్జరీ విజయవంతం కాగా.. సోమవారం (జనవరి 2) ప్రైవేట్ వార్డులోకి షిఫ్ట్ చేశారు. అయితే ఈ ప్రమాదంపై క్రికెట్ ప్రపంచమంతా ఒకలా స్పందించగా.. మాజీ కెప్టెన్ కపిల్ దేవ్ మాత్రం కాస్త భిన్నంగా రియాక్ట్ అయ్యాడు. ఇదొక పాఠం కావాలని అతడు అనడం గమనార్హం. “ఇదొక గుణపాఠం. నేను క్రికెట్ ఆడుతున్న కొత్తలో ఓ మోటార్ సైకిల్ ప్రమాదానికి గురయ్యాను. అప్పటి నుంచి నా సోదరుడు నన్ను కనీసం బైక్ను ముట్టుకోనివ్వలేదు.
రిషబ్ పంత్ సురక్షితంగా బయటపడినందుకు ఆ దేవుడికి కృతజ్ఞతలు” అని కపిల్ ఏబీపీ న్యూస్తో చెప్పాడు. క్రికెటర్లు చాలా జాగ్రత్తగా ఉండాలని, డ్రైవింగ్ కోసం ప్రత్యేకంగా ఓ డ్రైవర్ను పెట్టుకోవడం వాళ్లకు పెద్ద కష్టమైన పనేమీ కాదని అన్నాడు. “నిజమే. మీ దగ్గర మంచి కారు ఉండొచ్చు. మంచి స్పీడుతో వెళ్తుండొచ్చు. కానీ చాలా జాగ్రత్తగా ఉండాలి. మీరు సులువుగా ఓ డ్రైవర్ను పెట్టుకోగలరు. మీకు మీరుగా డ్రైవింగ్ చేయాల్సిన అవసరం లేదు. కొందరికి ఈ అలవాట్లు, అభిరుచులు ఉండొచ్చు. ఈ వయసులో అది సహజమే. కానీ మీపై బాధ్యతలు కూడా ఉన్నాయి. మిమ్మల్ని మీరు మాత్రమే జాగ్రత్తగా చూసుకోగలరు. మీకు మీరే నిర్ణయాలు తీసుకోవాలి” అని కపిల్ దేవ్ అన్నాడు. ఈ ప్రమాదంలో పంత్ ప్రాణాలతో బయటపడటం నిజంగా అదృష్టమే అని చెప్పాలి. హర్యానా రోడ్ ట్రావెల్కు చెందిన బస్సు డ్రైవర్ సుశీల్ మాన్, ఆ బస్సు కండక్టర్ పంత్ను కాపాడటంతో కీలకపాత్ర పోషించారు. వాళ్లను ఉత్తరాఖండ్ ప్రభుత్వం ఘనంగా సన్మానించాలని నిర్ణయించడం విశేషం.
