భారత్-కెనడా దేశాల మధ్య దౌత్య సంబంధాల్లో సరికొత్త అధ్యాయం మొదలుకానుంది. భారత ప్రధానమంత్రి నరేంద్ర మోదీ రాబోయే డిసెంబర్ 11, 12 తేదీల్లో కెనడాలో పర్యటించనున్నారని ఆ దేశ ప్రధాని మార్క్ కార్నీ అధికారికంగా వెల్లడించారు. ఆల్బెర్టాలో జరగనున్న రిఫరెండమ్ ఓటింగ్‌కు ముందు కాల్గరీలోని ఓ స్థానిక రెస్టారెంట్‌లో సందర్శకులతో మాట్లాడిన సందర్భంగా కార్నీ ఈ విషయాన్ని ధ్రువీకరించారు. తాను ప్రధాని మోదీతో నేరుగా సంప్రదింపులు జరుపుతానని, ఈ ద్వైపాక్షిక పర్యటన ప్రధానంగా టొరంటో, ఒట్టావా నగరాల్లో కొనసాగుతుందని, పరిస్థితులను బట్టి ఇతర నగరాలకూ విస్తరించే అవకాశం ఉందని ఆయన స్పష్టం చేశారు.
గత కొన్నేళ్లుగా తీవ్ర ఉద్రిక్తతలకు గురైన ఇరుదేశాల మైత్రి.. కెనడాలో నాయకత్వ మార్పు తర్వాత మళ్లీ గాడిన పడుతోంది. 2023లో అప్పటి కెనడా ప్రధాని జస్టిన్ ట్రూడో చేసిన ఆరోపణలు, దౌత్యవేత్తల బహిష్కరణలతో సంబంధాలు తీవ్రంగా దెబ్బతిన్నప్పటికీ, గతేడాది మార్క్ కార్నీ ప్రధానిగా బాధ్యతలు చేపట్టినప్పటి నుంచి సానుకూల వాతావరణం ఏర్పడింది. భారత్‌ను ఒక “నమ్మకమైన వాణిజ్య భాగస్వామి”గా అభివర్ణించిన కార్నీ ప్రభుత్వం.. గత విమర్శలను అధిగమిస్తూ సత్సంబంధాల పునరుద్ధరణకు బలమైన పునాది వేసింది. అలాగే కెనడాలో జరుగుతున్న అణచివేత చర్యలకు విదేశీ శక్తులతో ఎలాంటి నేరపూరిత సంబంధాలు ఉన్నట్లు ఆధారాలు లేవని కెనడా రాయల్ మౌంటెడ్ పోలీస్ కమిషనర్ కూడా ఇటీవల స్పష్టతనిచ్చారు.
ఈ క్రమంలో ఇరుదేశాల మధ్య ఆర్థిక మరియు వాణిజ్య సహకారాన్ని మరింత విస్తరించేందుకు దౌత్యపరమైన చర్చలు వేగవంతమయ్యాయి. 2030 నాటికి ద్వైపాక్షిక వాణిజ్యాన్ని ఏటా 70 బిలియన్ డాలర్లకు చేర్చాలనే ప్రతిష్టాత్మక లక్ష్యంతో ఇరుదేశాలు పనిచేస్తున్నాయి. ఈ ఏడాది చివరినాటికి కీలక వాణిజ్య ఒప్పందాన్ని ఖరారు చేసే లక్ష్యంతో కెనడా అంతర్జాతీయ వాణిజ్య మంత్రి మనీందర్ సిద్ధూ ప్రస్తుతం భారత్‌లో 6 రోజుల పాటు పర్యటిస్తున్నారు. ఈ నేపథ్యంలో ప్రధాని మోదీ కెనడా పర్యటన ఖరారు కావడం ఇరుదేశాల వాణిజ్య, వ్యూహాత్మక భాగస్వామ్యాన్ని సరికొత్త శిఖరాలకు తీసుకెళ్తుందని విశ్లేషకులు భావిస్తున్నారు.
