అనంతపురం జిల్లా రాయదుర్గం
అంగన్వాడీ కార్యకర్తలకు నవచేతన కార్యక్రమంపై శిక్షణ
కనేకల్, జూన్ 8: కనేకల్ మండలంలోని అంగన్వాడీ కార్యకర్తలకు కనేకల్ ప్రభుత్వ బాలుర ఉన్నత పాఠశాలలో “నవచేతన” (AI Enabled ECD Screening for 0-6 Years Children) కార్యక్రమంపై ప్రత్యేక శిక్షణ నిర్వహించారు. చిన్నారుల సమగ్ర అభివృద్ధి, ఆరోగ్య పరిరక్షణ లక్ష్యంగా ఈ కార్యక్రమాన్ని చేపట్టినట్లు అధికారులు తెలిపారు.
ఈ సందర్భంగా ఐసీడీఎస్ సీడీపీఓ ఎ. నాగమణి మాట్లాడుతూ, 0 నుంచి 6 సంవత్సరాల లోపు పిల్లల శారీరక, మానసిక, భాషా మరియు సామాజిక అభివృద్ధిలో తలెత్తే సమస్యలను ప్రారంభ దశలోనే గుర్తించి తగిన సేవలు అందించేందుకు నవచేతన కార్యక్రమం ఎంతో ఉపయోగకరంగా ఉంటుందని పేర్కొన్నారు. కృత్రిమ మేధస్సు (AI) సాంకేతికత ద్వారా పిల్లల ఎదుగుదలలో ఉన్న లోపాలు, అభివృద్ధి జాప్యాలను సులభంగా గుర్తించే విధానంపై కార్యకర్తలకు అవగాహన కల్పించారు.
ఎర్రగుంట పీహెచ్సీ వైద్యాధికారి మాట్లాడుతూ, పిల్లల ఎదుగుదలలో మైలురాళ్లు (Milestones) అత్యంత కీలకమని తెలిపారు. పిల్లలు తమ వయస్సుకు అనుగుణంగా తల ఎత్తడం, కూర్చోవడం, నడవడం, మాట్లాడడం వంటి నైపుణ్యాలను సాధించడం ఆరోగ్యకరమైన అభివృద్ధికి సూచికలని వివరించారు. తల్లిదండ్రులు, అంగన్వాడీ కార్యకర్తలు పిల్లల అభివృద్ధిని నిరంతరం గమనిస్తూ, ఏవైనా జాప్యాలు కనిపిస్తే వెంటనే వైద్యుల సలహాలు తీసుకోవాలని సూచించారు.
శిక్షణలో భాగంగా మొబైల్ యాప్ వినియోగం, పిల్లల బరువు, ఎత్తు కొలతల నమోదు, స్క్రీనింగ్ ప్రక్రియ, డేటా అప్లోడ్ విధానం తదితర అంశాలపై ప్రాక్టికల్ శిక్షణ అందించారు. అంగన్వాడీ కేంద్రాల్లో ఈ కార్యక్రమాన్ని సమర్థవంతంగా అమలు చేసి ప్రతి చిన్నారికి నాణ్యమైన సేవలు అందించేందుకు కృషి చేయాలని సూచించారు.
పిల్లల ఆరోగ్య పరిస్థితి, పోషకాహార స్థితి, అభివృద్ధి మైలురాళ్లను సకాలంలో గుర్తించడం ద్వారా అవసరమైన వైద్య సేవలు అందించే అవకాశం కలుగుతుందని అధికారులు తెలిపారు.
ఈ కార్యక్రమంలో సూపర్వైజర్లు జి. ఈశ్వరమ్మ, ఎస్. తిరుపాల్ బాయి, జి.వై. గీత, హెల్త్ సూపర్వైజర్ పార్వతమ్మ, బ్లాక్ కోఆర్డినేటర్ బి. వెంకట రంగయ్య, నియోజకవర్గ విజన్ కార్యాచరణ ప్రణాళిక బృంద సభ్యులు డి. రసూల్ అశోక్, కార్తీక్తో పాటు అంగన్వాడీ కార్యకర్తలు పాల్గొన్నారు. నవచేతన కార్యక్రమం ద్వారా చిన్నారుల సమగ్ర అభివృద్ధికి మరింత తోడ్పాటు అందుతుందని ఆశాభావం వ్యక్తం చేశారు.
