ఈ ఏడాది క్రిస్మస్ పండుగ సందర్భంగా టాలీవుడ్ బాక్సాఫీస్ వద్ద తీవ్ర పోటీ నెలకొంది. ఈ నెల 25న పలు క్రేజీ తెలుగు చిత్రాలు విడుదలకు సిద్ధమవుతుండగా, అదే సమయంలో మలయాళ సూపర్ స్టార్ మోహన్ లాల్ నటించిన డబ్బింగ్ సినిమా ‘వృషభ’ కూడా థియేటర్లలోకి రానుంది. గీతా ఆర్ట్స్ ఈ చిత్రాన్ని తెలుగులో విడుదల చేస్తుండటంతో, నేరుగా తెలుగు సినిమాల మధ్య డబ్బింగ్ సినిమాను ఎందుకు తీసుకువస్తున్నారనే ప్రశ్నలపై నిర్మాత బన్నీ వాసు స్పందించారు.
నిజానికి ‘వృషభ’ సినిమా రెండు నెలల క్రితమే విడుదల కావాల్సి ఉందని, కానీ గ్రాఫిక్స్ (CG) పనుల్లో జాప్యం కారణంగా ఇప్పుడు విడుదల చేయాల్సి వస్తోందని బన్నీ వాసు వివరించారు. ఈ చిత్రాన్ని నిర్మించిన కనెక్ట్ మీడియా సంస్థతో గీతా ఆర్ట్స్ కు ఉన్న ఒప్పందం మరియు మలయాళంలో అల్లు ఫ్యామిలీకి ఉన్న ప్రత్యేక క్రేజ్ దృష్ట్యా ఈ నిర్ణయం తీసుకున్నట్లు తెలిపారు. కేవలం వ్యాపార దృక్పథంతోనే కాకుండా, నిర్మాణ సంస్థలతో ఉన్న పాత సంబంధాల వల్ల సినిమాను వాయిదా వేయలేకపోయామని ఆయన స్పష్టం చేశారు.
ఇక డిసెంబర్ 25న బాక్సాఫీస్ వద్ద భారీ పోరు సాగనుంది. ఆది సాయికుమార్ ‘శంబాల’, రోషన్ ‘ఛాంపియన్’, శివాజీ–నవదీప్ల ‘దండోరా’తో పాటు సుదీప్ హీరోగా వస్తున్న ‘మార్క్’ వంటి చిత్రాలు లైన్లో ఉన్నాయి. ఇదే సమయంలో ఫిల్మ్ చాంబర్ ఎన్నికల నామినేషన్ ఉపసంహరణపై కూడా బన్నీ వాసు స్పందిస్తూ, ప్రస్తుత బిజీ షెడ్యూల్ వల్ల ఎన్నికలపై దృష్టి పెట్టలేననే ఉద్దేశంతోనే వెనక్కి తగ్గినట్లు వెల్లడించారు.
