ఆంధ్రప్రదేశ్‌ రాష్ట్రానికి భారీ ఎత్తున పెట్టుబడులను ఆకర్షించడమే లక్ష్యంగా ముఖ్యమంత్రి నారా చంద్రబాబు నాయుడు అధ్యక్షతన గురువారం రాష్ట్ర పెట్టుబడుల ప్రోత్సాహక మండలి (SIPB) 22వ ఉన్నత స్థాయి సమావేశం జరిగింది. గతంలో కుదిరిన ఒప్పందాలు కేవలం కాగితాలకే పరిమితం కాకుండా, వాటిని క్షేత్రస్థాయిలో వాస్తవ పెట్టుబడులుగా మార్చి ఉత్పత్తి ప్రారంభించేలా చూడాలని ముఖ్యమంత్రి అధికారులను ఆదేశించారు. పరిశ్రమల స్థాపనకు అవసరమైన అన్ని అనుమతులను వేగవంతం చేసి, ప్రాజెక్టులు త్వరితగతిన కార్యరూపం దాల్చేలా చర్యలు తీసుకోవాలని స్పష్టం చేశారు.
ఈ సమావేశంలో మంత్రులు నారా లోకేశ్, టీజీ భరత్, అనగాని సత్యప్రసాద్, గొట్టిపాటి రవికుమార్, పి. నారాయణ, కందుల దుర్గేశ్ వర్చువల్ పద్ధతిలో పాల్గొన్నారు. పరిశ్రమలు, ఇంధనం, పర్యాటకం, ఐటీ, ఎలక్ట్రానిక్స్, ఫుడ్ ప్రాసెసింగ్ వంటి పలు కీలక రంగాలకు సంబంధించి వచ్చిన భారీ పెట్టుబడి ప్రతిపాదనలపై బోర్డు విస్తృతంగా చర్చించింది. గతంలో కుదిరిన 714 ఒప్పందాలకు గాను, ఇప్పటివరకు 519 ప్రాజెక్టులకు సంబంధించిన పనులు ప్రారంభమై పురోగతిలో ఉన్నట్లు అధికారులు ఈ సందర్భంగా ముఖ్యమంత్రికి వివరించారు.
రాష్ట్రంలో భవిష్యత్ అవసరాలను దృష్టిలో ఉంచుకుని సెమీకండక్టర్ల తయారీకి అవసరమైన సమగ్ర ఎకోసిస్టమ్‌ను అత్యంత వేగంగా అభివృద్ధి చేయాలని సీఎం చంద్రబాబు దిశానిర్దేశం చేశారు. రాష్ట్రంలోని పోర్టులు, విమానాశ్రయాలు, రహదారులు, రైల్వే నెట్‌వర్క్‌లను పటిష్ఠం చేస్తూ తూర్పు, పశ్చిమ ప్రాంతాలను వేగంగా అనుసంధానించాలని సూచించారు. నూతన గ్లోబల్ పెట్టుబడులను రాష్ట్రానికి రప్పించడంతో పాటు, నిర్మాణంలో ఉన్న పరిశ్రమలు త్వరగా అందుబాటులోకి వచ్చేలా చూడటమే ప్రభుత్వ ప్రధాన లక్ష్యమని ఆయన పేర్కొన్నారు.
