మాజీ ప్రధాన మంత్రి, ప్రముఖ ఆర్థికవేత్త డాక్టర్ మన్మోహన్ సింగ్కు దేశ అత్యున్నత పౌర పురస్కారమైన ‘భారతరత్న’ ప్రకటించాలని తెలంగాణ ముఖ్యమంత్రి రేవంత్ రెడ్డి కేంద్ర ప్రభుత్వాన్ని కోరారు. శనివారం హైదరాబాద్లోని నానక్రాంగూడ ఫైనాన్షియల్ డిస్ట్రిక్ట్లో ఏర్పాటు చేసిన డాక్టర్ మన్మోహన్ సింగ్ విగ్రహాన్ని ముఖ్యమంత్రి స్వయంగా ఆవిష్కరించారు. ఈ సందర్భంగా భారతదేశానికి ఆయన అందించిన అసమాన సేవలను సీఎం రేవంత్ రెడ్డి ప్రత్యేకంగా గుర్తుచేసుకున్నారు.
దేశ ఆర్థిక వ్యవస్థను పరుగులు పెట్టించడంలో మన్మోహన్ సింగ్ పోషించిన పాత్ర చిరస్మరణీయమని ముఖ్యమంత్రి కొనియాడారు. ఆయన సేవలను గౌరవిస్తూ జాతీయ రాజధాని ఢిల్లీలో ఒక ప్రత్యేక ‘విజ్ఞాన కేంద్రాన్ని’ ఏర్పాటు చేయాలని కేంద్ర ప్రభుత్వాన్ని గట్టిగా డిమాండ్ చేశారు. దేశ భవిష్యత్తు కోసం మన్మోహన్ సింగ్ చూపిన దార్శనికతను, ఆయన నిబద్ధతను భవిష్యత్ తరాలకు తెలియజేసేలా ఈ స్మారక కేంద్రం రూపుదిద్దుకోవాలని ఆకాంక్షించారు.
ముఖ్యంగా 1991లో దేశం తీవ్ర ఆర్థిక సంక్షోభాన్ని ఎదుర్కొన్న విపత్కర పరిస్థితుల్లో కేంద్ర ఆర్థిక మంత్రిగా మన్మోహన్ సింగ్ తీసుకున్న సాహసోపేతమైన నిర్ణయాలు భారత్ను గట్టెక్కించాయని సీఎం ప్రశంసించారు. ఆయన ప్రవేశపెట్టిన సరళీకృత ఆర్థిక విధానాలు దేశ ఆర్థిక రూపురేఖలను పూర్తిగా మార్చివేశాయని, భారత్ను నేడు ప్రపంచంలోనే అగ్రగామి ఆర్థిక శక్తుల్లో ఒకటిగా నిలబెట్టడంలో ఆయన కృషి అనన్యసామాన్యమైనదని రేవంత్ రెడ్డి శ్లాఘించారు.
