2026 చివరి రెండు నెలల్లో టాలీవుడ్ బాక్సాఫీస్ వద్ద అసలైన సందడి మొదలుకానుంది. యంగ్ హీరోలంతా వరుస సినిమాలతో ప్రేక్షకుల ముందుకు వచ్చేందుకు సిద్ధమవుతున్నారు. బ్యాక్ టు బ్యాక్ రిలీజ్‌లతో బాక్సాఫీస్ వద్ద పోటీ పెరగనుండగా, ఈ సినిమాల్లో ఏవి బ్లాక్‌బస్టర్ విజయాలను అందుకుంటాయన్నది ఆసక్తికరంగా మారింది. ముఖ్యంగా తమ కెరీర్‌లో మంచి హిట్ కోసం ఎదురుచూస్తున్న హీరోలకు ఈ చిత్రాలు కీలకంగా మారనున్నాయి.
నవంబర్ 12న శర్వానంద్ నటిస్తున్న ‘భోగి’ సినిమాతో బాక్సాఫీస్ సందడి ప్రారంభం కానుంది. దర్శకుడు సంపత్ నంది తెలంగాణ నేపథ్యంలో పవర్‌ఫుల్ పీరియడ్ యాక్షన్ డ్రామాగా ఈ చిత్రాన్ని తెరకెక్కిస్తున్నారు. ఆ తర్వాత నవంబర్ 19న యూత్‌లో మంచి క్రేజ్ సంపాదించుకున్న ‘ఈ నగరానికి ఏమైంది 2’ సినిమాతో మాస్ కా దాస్ విశ్వక్‌సేన్ ప్రేక్షకుల ముందుకు రానున్నారు. ఈ సీక్వెల్‌పై ఇప్పటికే ప్రేక్షకుల్లో ఆసక్తి నెలకొంది.
ఇక నవంబర్ 20న మలయాళ స్టార్ దుల్కర్ సల్మాన్ ‘ఆకాశంలో ఒక తార’ సినిమాతో బాక్సాఫీస్ బరిలోకి దిగనున్నారు. వరుసగా మూడు సినిమాలు విడుదలకు సిద్ధమవుతుండటంతో థియేటర్ల వద్ద పోటీ మరింత ఆసక్తికరంగా మారనుంది. ఈ చిత్రాల్లో ప్రేక్షకులను ఎక్కువగా ఆకట్టుకునే సినిమా ఏది? భారీ వసూళ్లతో విజేతగా నిలిచే హీరో ఎవరు? అన్నది తెలియాలంటే విడుదలల వరకు వేచి చూడాల్సిందే.
