తాడిమర్రి( yes9tv )చిత్రావతి నదిని కొల్లగొడుతున్న ఇసుక మాఫియా..? అధికార పార్టీ పేరుతో బెదిరింపులు చేస్తున్నారంటూ రైతుల ఆవేదన
తాడిమర్రి, జూలై 4: తాడిమర్రి మండలంలోని దాడితోట–నాయనపల్లి గ్రామాల సరిహద్దుల్లో ప్రవహిస్తున్న చిత్రావతి నది పరివాహక ప్రాంతంలో భారీ ఎత్తున ఇసుక అక్రమ రవాణా జరుగుతోందని రైతులు తీవ్ర ఆందోళన వ్యక్తం చేశారు. కొందరు అధికార పార్టీ నాయకుల అండదండలతో అదే గ్రామానికి చెందిన వ్యక్తులు రోజుకు సుమారు 50 నుంచి 100 ట్రాక్టర్ల వరకు ఇసుకను అక్రమంగా తరలిస్తున్నారని వారు ఆరోపించారు.
ఈ అక్రమ రవాణాపై రైతులు సంబంధిత అధికారులకు ఫిర్యాదు చేయడంతో ఇసుక తరలింపును అడ్డుకునేందుకు రెవెన్యూ శాఖ అధికారులు వీఆర్వో, వీఆర్ఏలను విధుల్లో నియమించినట్లు తెలిపారు. అయితే, విధులు నిర్వహిస్తున్న సిబ్బందిని లక్ష్యంగా చేసుకుని కొందరు మహిళా కూలీలతో అసభ్యంగా ప్రవర్తించేలా ప్రేరేపిస్తూ, “చీరలు, జాకెట్లు చింపుకుని కేసులు పెడతామని” బెదిరింపులకు పాల్పడుతున్నారని రైతులు ఆరోపించారు. ఇటువంటి చర్యల వల్ల ప్రభుత్వ సిబ్బంది కూడా విధులు నిర్వర్తించడానికి భయపడే పరిస్థితి ఏర్పడిందని ఆవేదన వ్యక్తం చేశారు.
ప్రస్తుతం వర్షపాతం తక్కువగా ఉండటంతో చిత్రావతి నదిలో నీటి నిల్వలు తగ్గాయని, ఇలాంటి సమయంలో విచక్షణారహితంగా ఇసుకను తరలించడం వల్ల భూగర్భ జలాలు మరింత వేగంగా అడుగంటిపోయే ప్రమాదం ఉందని రైతులు హెచ్చరించారు. భవిష్యత్తులో బోర్లు ఎండిపోవడంతో పాటు వ్యవసాయం తీవ్రంగా దెబ్బతినే అవకాశం ఉందని పేర్కొన్నారు.
అక్రమ ఇసుక రవాణా కారణంగా నది సహజ స్వరూపం దెబ్బతింటోందని, పర్యావరణ సమతుల్యతకు ముప్పు ఏర్పడుతోందని రైతులు తెలిపారు. గ్రామీణ రహదారులపై భారీ ట్రాక్టర్లు అధిక వేగంతో తిరగడం వల్ల ప్రమాదాల ముప్పు పెరుగుతోందని, రోడ్లు కూడా దెబ్బతింటున్నాయని ఆందోళన వ్యక్తం చేశారు.
అధికార పార్టీ నాయకుల పేర్లు చెప్పుకొని చట్టాన్ని ధిక్కరిస్తూ ఇసుక అక్రమ రవాణాకు పాల్పడుతున్న వారిని గుర్తించి కఠిన చర్యలు తీసుకోవాలని దాడితోట, నాయనపల్లి గ్రామాల రైతులు జిల్లా యంత్రాంగాన్ని కోరారు. చిత్రావతి నదిలో నిరంతర నిఘా ఏర్పాటు చేసి అక్రమ ఇసుక రవాణాను పూర్తిగా అరికట్టాలని, అక్రమంగా తరలించిన ఇసుక, వాహనాలను స్వాధీనం చేసుకుని బాధ్యులపై చట్టపరమైన చర్యలు తీసుకోవాలని వారు డిమాండ్ చేశారు.
అలాగే ఈ వ్యవహారంపై జిల్లా ఉన్నతాధికారులు స్వయంగా విచారణ జరిపి వాస్తవాలను వెలుగులోకి తీసుకురావాలని, నది పరిరక్షణతో పాటు రైతుల ప్రయోజనాలను కాపాడాలని విజ్ఞప్తి చేశారు.
