మంగళగిరిలోని జనసేన పార్టీ రాష్ట్ర కార్యాలయం వద్ద శుక్రవారం ఉదయం ఒక్కసారిగా ఉద్రిక్త వాతావరణం నెలకొంది. గుర్తు తెలియని ఒక వ్యక్తి హఠాత్తుగా కార్యాలయం లోపలికి చొరబడి, పార్కింగ్ ఏరియాలో ఉన్న రెండు కార్లపై రాడ్డుతో విచక్షణారహితంగా దాడి చేశాడు. కార్ల అద్దాలను పగులగొట్టి ధ్వంసం చేయడంతో అక్కడ ఉన్న పార్టీ నాయకులు, కార్యకర్తలు తీవ్ర దిగ్భ్రాంతికి గురయ్యారు. సమాచారం అందుకున్న మంగళగిరి పోలీసులు వెంటనే అక్కడికి చేరుకుని నిందితుడిని అదుపులోకి తీసుకున్నారు.
పోలీసుల ప్రాథమిక విచారణలో నిందితుడిని శ్రీకాకుళం జిల్లా ఇచ్ఛాపురానికి చెందిన నీలాద్రిగా గుర్తించారు. నిందితుడు ఏ ఉద్దేశంతో మంగళగిరి వరకు వచ్చాడు? ఈ దాడికి గల అసలు కారణాలేంటి? అనే కోణంలో పోలీసులు లోతుగా ఆరా తీస్తున్నారు. నిందితుడి మానసిక స్థితి సరిగ్గా లేకపోవడం వల్ల ఇలా చేశాడా లేక దీని వెనుక ఏదైనా రాజకీయ కుట్ర ఉందా అనే అంశాలపై విచారణ కొనసాగుతోంది. ఘటనా స్థలంలోని సీసీటీవీ ఫుటేజీని పోలీసులు స్వాధీనం చేసుకుని పరిశీలిస్తున్నారు.
అత్యంత భద్రత ఉండే పార్టీ ప్రధాన కార్యాలయంలోకి ఒక వ్యక్తి రాడ్డుతో చొరబడి వాహనాలను ధ్వంసం చేయడంపై జనసేన శ్రేణులు తీవ్ర ఆందోళన వ్యక్తం చేస్తున్నాయి. ఈ ఘటన జరిగిన వెంటనే పోలీసులు కార్యాలయం వద్ద అదనపు బలగాలను మోహరించి భద్రతను మరింత పటిష్టం చేశారు. ఈ దాడి జరిగిన సమయంలో కార్యాలయంలో ఎవరెవరు ఉన్నారు మరియు నిందితుడికి ఎవరైనా సహకరించారా అనే కోణంలో దర్యాప్తు ముమ్మరం చేశారు.
