సినిమాలో తల్లి ప్రాణాల కోసం హీరో బిచ్చగాడి దీక్ష చేయడం చూశాం. కానీ, నిజ జీవితంలో తన భార్య ప్రాణాలను కాపాడుకోవడం కోసం ఒక అడ్వకేట్ బిచ్చగాడిగా మారిన హృదయవిదారక ఘటన రాజన్న సిరిసిల్ల జిల్లా వేములవాడలో వెలుగుచూసింది. పెద్దపల్లి జిల్లా మంథనికి చెందిన అడ్వకేట్ కాసర్ల జలంధర్ రెడ్డి, తన భార్య శిరీష అనారోగ్యం నుంచి కోలుకోవాలని గత మూడు నెలలుగా వేములవాడ రాజన్న సన్నిధిలో భిక్షాటన చేస్తున్నారు. కలెక్టర్ ఆదేశాల మేరకు అధికారులు నిర్వహించిన కౌన్సిలింగ్లో, అనర్గళంగా ఇంగ్లీష్లో మాట్లాడుతున్న ఈ దంపతులను చూసి అధికారులు సైతం విస్మయానికి గురయ్యారు.
చదువుకున్న వ్యక్తి అయ్యుండి, వృత్తిరీత్యా అడ్వకేట్ అయినప్పటికీ జలంధర్ రెడ్డి ఈ నిర్ణయం తీసుకోవడం వెనుక పెద్ద వేదనే ఉంది. తన భార్య వైద్యం కోసం ఉన్న ఆస్తినంతా ఖర్చు చేశానని, ఎన్నో ఆసుపత్రులు తిరిగినా ఫలితం లేకపోవడంతో చివరికి భగవంతుడిపైనే భారం వేసి ఇలా భిక్షాటన చేస్తున్నానని ఆయన కన్నీరుమునిగారు. శిరీషకు పోలియో ఉన్నప్పటికీ ప్రభుత్వం నుంచి పెన్షన్ రావడం లేదని, అది వస్తే తమకు కొంత ఆసరాగా ఉంటుందని ఆ దంపతులు అధికారులకు విన్నవించుకున్నారు. ఈ ఉదంతం ఇప్పుడు సోషల్ మీడియాలో చర్చనీయాంశంగా మారింది.
ఆధ్యాత్మిక దీక్షలు – వైద్య శాస్త్రం ఇలాంటి దీక్షలు రోగాలను నయం చేస్తాయా? అనే ప్రశ్నపై భిన్నాభిప్రాయాలు ఉన్నాయి. ఆధ్యాత్మికవేత్తల ప్రకారం.. భగవద్గీతలోని కర్మ సిద్ధాంతం ప్రకారం తపస్సు, దానం వంటివి పాప కర్మల నుంచి విముక్తిని ప్రసాదిస్తాయి. బిచ్చగాడిలా ఉండటం అనేది అహంకారాన్ని తగ్గించి దైవిక శక్తిని ఆకర్షిస్తుందని నమ్ముతారు. అయితే, వైద్య నిపుణులు మాత్రం భిన్నంగా స్పందిస్తున్నారు. ఆధ్యాత్మికత మనశ్శాంతిని, మానసిక ధైర్యాన్ని ఇస్తుంది కానీ, అది శాస్త్రీయ వైద్యానికి ప్రత్యామ్నాయం కాదు. శ్రీరామకృష్ణ పరమహంస వంటి గొప్ప ఆధ్యాత్మిక గురువులే క్యాన్సర్ వంటి వ్యాధుల బారిన పడ్డారని గుర్తు చేస్తున్నారు. భక్తి అనేది మనసును బలపరుస్తుంది తప్ప, శరీరంలోని రోగాలను నయం చేయడానికి సరైన వైద్య చికిత్స తప్పనిసరి.
