శ్రీ సత్యసాయి జిల్లా నల్లమడ మండల పరిధిలోని గోపేపల్లి గ్రామంలో తోలేటి ప్రభావతమ్మ అనే మహిళా రైతుకు చెందిన మామిడి తోటలో భారీ అగ్నిప్రమాదం సంభవించింది. చూస్తుండగానే మంటలు తోటంతా వ్యాపించి సుమారు 400 మామిడి చెట్లు పూర్తిగా కాలిపోయాయి. ఈ ఏడాది మామిడి పూత ఆశాజనకంగా ఉండటంతో మంచి దిగుబడి వస్తుందని, అప్పులు తీరుతాయని ఆశపడ్డ రైతుకు ఈ ప్రమాదం కోలుకోలేని దెబ్బ తీసింది.
తోటలో మంటలు చెలరేగగానే అదుపు చేసేందుకు ప్రయత్నించినప్పటికీ, ఎండ తీవ్రత వల్ల మంటలు వేగంగా విస్తరించాయి. కళ్లముందే ఏళ్ల తరబడి పెంచుకున్న చెట్లు కాలి బూడిదవుతుంటే ప్రభావతమ్మ ఆవేదన వర్ణనాతీతంగా ఉంది. పెట్టుబడి కోసం తెచ్చిన అప్పులు ఎలా తీర్చాలో తెలియక ఆ కుటుంబం దిక్కుతోచని స్థితిలో ఉంది. సుమారు లక్షల రూపాయల మేర ఆస్తి నష్టం వాటిల్లిందని బాధితులు వాపోతున్నారు.
ప్రభుత్వం మరియు ఉద్యానవన శాఖ అధికారులు స్పందించి, వెంటనే నష్టపరిహారాన్ని అంచనా వేయాలని గ్రామస్తులు కోరుతున్నారు. కష్టకాలంలో ఉన్న రైతు కుటుంబాన్ని ఆర్థికంగా ఆదుకుని, వారికి భరోసా కల్పించాలని బాధితులు విజ్ఞప్తి చేస్తున్నారు. ఇలాంటి ప్రమాదాలు పునరావృతం కాకుండా తోటల వద్ద తగిన జాగ్రత్తలు తీసుకోవాలని అధికారులు సూచిస్తున్నారు.
