మంచిర్యాల మున్సిపల్ కార్పొరేషన్లో కాంగ్రెస్ పార్టీ భారీ విజయాన్ని నమోదు చేసింది. మొత్తం 60 డివిజన్లలో 44 స్థానాలను గెలుచుకుని ఏకపక్ష మెజారిటీని సాధించింది. సోమవారం జరిగిన పరోక్ష ఎన్నికల్లో కార్పొరేషన్ తొలి మేయర్గా ధర్ని మధు, డిప్యూటీ మేయర్గా రమ్య బాధ్యతలు చేపట్టారు. బీఆర్ఎస్ కేవలం 8 స్థానాలకే పరిమితం కాగా, బీజేపీ 5 స్థానాలను దక్కించుకుంది.
మరోవైపు ఆదిలాబాద్ మున్సిపాలిటీలో రాజకీయ సమీకరణాలు ఆసక్తికరంగా మారాయి. ఇక్కడ కాంగ్రెస్, బీఆర్ఎస్, ఎంఐఎం మరియు స్వతంత్ర అభ్యర్థులు ఒక్కటై బీజేపీని అడ్డుకున్నారు. అందరి మద్దతుతో స్వతంత్ర అభ్యర్థి బండారి అనూష ఛైర్పర్సన్గా ఎన్నికయ్యారు. నిర్మల్ మున్సిపాలిటీలో కాంగ్రెస్ జెండా ఎగురవేయగా, భార్యాభర్తలు అప్పాల కావ్య ఛైర్పర్సన్గా, అప్పాల గణేశ్ చక్రవర్తి వైస్ ఛైర్మన్గా ఎన్నికై కొత్త రికార్డు సృష్టించారు.
ఉమ్మడి జిల్లా వ్యాప్తంగా కాంగ్రెస్ పార్టీ తన పట్టును నిరూపించుకుంది. లక్సెట్టిపేట, చెన్నూర్, బెల్లంపల్లి వంటి మున్సిపాలిటీలు కూడా హస్తం ఖాతాలోకే వెళ్లాయి. అయితే ఆసిఫాబాద్లో మాత్రం బీఆర్ఎస్ తన ఆధిపత్యాన్ని కాపాడుకుంది. అక్కడ ఛైర్మన్గా మెంగ్రే ఆకాశ్ ఎన్నికయ్యారు. బైంసాలో స్వతంత్ర అభ్యర్థి తూమెల్ల దత్తాత్రి అన్ని పార్టీల మద్దతుతో ఛైర్మన్ పీఠాన్ని దక్కించుకోవడం విశేషం.
