మేడ్చల్ జిల్లాలోని పలు ప్రాంతాల్లో మంగళవారం ఉదయం భూమి కంపించడంతో స్థానిక ప్రజలు తీవ్ర భయాందోళనకు గురయ్యారు. ముఖ్యంగా కుత్బుల్లాపూర్ మండల పరిధిలోని గాజులరామారం, ఆదర్శనగర్ వంటి ప్రాంతాల్లో కొన్ని సెకన్ల పాటు భూమి ఒక్కసారిగా షేక్ అయ్యింది. దీంతో ఏం జరుగుతుందో అర్థం కాక జనం ఇళ్ల నుంచి వీధుల్లోకి పరుగులు తీశారు. భూగర్భం నుంచి పెద్ద శబ్దం రావడంతో భూకంపం వచ్చిందని భావించిన జనం ప్రాణాలు అరచేతిలో పెట్టుకుని ఖాళీ ప్రదేశాల్లోకి చేరుకున్నారు.
ఈ అకస్మాత్తు పరిణామంతో విద్యాసంస్థల్లో తీవ్ర కలకలం రేగింది. తరగతి గదుల్లో ఉన్న విద్యార్థులు భయంతో కేకలు వేస్తూ మైదానాల్లోకి వచ్చారు. పరిస్థితిని గమనించిన పాఠశాల యాజమాన్యాలు ముందస్తు జాగ్రత్తగా విద్యార్థులకు వెంటనే సెలవు ప్రకటించి, వారిని సురక్షితంగా ఇళ్లకు పంపించివేశారు. దీనికి సంబంధించిన దృశ్యాలు ప్రస్తుతం సోషల్ మీడియాలో వైరల్గా మారాయి. ఆదర్శనగర్ కాలనీలో జనం గుంపులుగా చేరి ఈ కంపనాల గురించి చర్చించుకోవడం వీడియోల్లో కనిపిస్తోంది.
అయితే, ఈ కంపనాలు నిజంగా భూకంపం వల్లే వచ్చాయా లేక స్థానికంగా ఉన్న మరేదైనా కారణాల వల్ల జరిగాయా అన్నది ఇంకా నిర్ధారణ కాలేదు. గతంలో కూడా హైదరాబాద్ పరిసర ప్రాంతాల్లో భూగర్భ జలాల మార్పులు లేదా స్థానిక భౌగోళిక కారణాల వల్ల స్వల్ప కంపనాలు వచ్చిన సందర్భాలు ఉన్నాయి. దీనిపై పూర్తి స్పష్టత రావాలంటే నేషనల్ జియోఫిజికల్ రీసెర్చ్ ఇన్స్టిట్యూట్ (NGRI) నిపుణులు పరిశీలించి నివేదిక ఇవ్వాల్సి ఉంది. ప్రస్తుతానికి అధికారులు ప్రజలెవరూ ఆందోళన చెందవద్దని సూచిస్తున్నారు.
