రాజమండ్రిలో విద్యార్థులతో జరిగిన ముఖాముఖిలో నారా లోకేశ్ తన వ్యక్తిగత జీవితం గురించి ఆసక్తికర విషయాలను పంచుకున్నారు. “మీ ఫస్ట్ క్రష్ ఎవరు?” అని ఓ విద్యార్థి అడిగిన ప్రశ్నకు లోకేశ్ చిరునవ్వుతో బదులిస్తూ.. తన భార్య బ్రహ్మణి తన మొదటి మరియు చివరి క్రష్ అని సమాధానమిచ్చారు. తన జీవితంలో క్రమశిక్షణకు తన తల్లి భువనేశ్వరి గారే కారణమని, నేటికీ ఆమె తప్పు చేస్తే దండిస్తారని చెబుతూ మాతృప్రేమ విలువను విద్యార్థులకు వివరించారు. ఈ సరదా సంభాషణలు కళాశాల ప్రాంగణంలో నవ్వులు పూయించాయి.
రాజకీయ ప్రస్థానం గురించి మాట్లాడుతూ, తన తండ్రి చంద్రబాబు నాయుడు గారికి ప్రజల నుంచి లభించే గౌరవాన్ని చూసి స్ఫూర్తి పొంది 2004-05 కాలంలోనే రాజకీయాల్లోకి రావాలని నిర్ణయించుకున్నట్లు తెలిపారు. ఓటమిని చూసి కుంగిపోవద్దని, 2019లో మంగళగిరిలో తాను ఓడిపోయినా కసితో పనిచేసి ఎలా విజయం సాధించానో విద్యార్థులకు వివరిస్తూ ధైర్యం చెప్పారు. విద్యార్థుల ఆత్మహత్యల నివారణకు ప్రభుత్వం త్వరలోనే ఒక ప్రత్యేక ‘ఫ్రేమ్వర్క్’ రూపొందిస్తుందని ఈ సందర్భంగా ఆయన కీలక హామీ ఇచ్చారు.
నేటి విద్యావిధానంలో మార్పుల గురించి చర్చిస్తూ, పరిశ్రమల అవసరాలకు తగ్గట్టుగా పాఠ్యాంశాలను (Curriculum) పునఃసమీక్షిస్తున్నామని లోకేశ్ వెల్లడించారు. ‘మిత్ర వాట్సాప్ గవర్నెన్స్’ ద్వారా పాలనలో విప్లవాత్మక మార్పులు తెస్తున్నామని, దీని ద్వారా వెయ్యికి పైగా సేవలు అందుబాటులోకి వచ్చాయని వివరించారు. కార్యక్రమం చివరలో విద్యార్థులందరితో కలిసి సెల్ఫీలు దిగుతూ లోకేశ్ సందడి చేశారు. విద్యావంతుడైన నాయకుడిగా విద్యార్థుల సమస్యలను వినడమే కాకుండా, వారిలో స్పూర్తిని నింపే ప్రయత్నం చేశారు.
