దేశంలోని ప్రముఖ ఐటీ సంస్థ ఇన్ఫోసిస్‌లో అత్యంత దారుణమైన ఘటన చోటుచేసుకుంది. ఆఫీస్ టాయిలెట్‌లో ఒక మహిళా ఉద్యోగిని రహస్యంగా వీడియో తీస్తున్న సహోద్యోగిని బాధితురాలు రెడ్‌హ్యాండెడ్‌గా పట్టుకున్నారు. ఈ ఆరోపణలపై బెంగళూరు పోలీసులు నిందితుడిని అరెస్ట్ చేసి విచారణ చేపట్టారు.
బెంగళూరు ఇన్ఫోసిస్‌లో సీనియర్ అసోసియేట్‌గా పనిచేస్తున్న నగేష్ స్వప్నిల్ మాలి సోమవారం ఈ నీచపు పనికి పాల్పడ్డాడు. ఆఫీస్‌లోని మహిళల టాయిలెట్‌లోకి వెళ్లిన ఒక ఉద్యోగిని, పక్కనే ఉన్న క్యూబికల్ నుంచి ఎవరో తనను వీడియో తీస్తున్నట్లు గమనించారు. వెంటనే అప్రమత్తమైన ఆమె, నిందితుడు నగేష్ అని గుర్తించి గట్టిగా కేకలు వేశారు. ఆమె అరుపులు విన్న ఇతర ఉద్యోగులు అక్కడికి చేరుకుని నగేష్‌ను పట్టుకున్నారు.
ఈ ఘటనపై బాధితురాలు పోలీసులకు ఫిర్యాదు చేశారు. ఆమె ఫిర్యాదు మేరకు, నగేష్ మొబైల్ ఫోన్‌ను పరిశీలించగా అందులో రికార్డ్ చేసిన వీడియో క్లిప్ లభించింది. అయితే, బాధితురాలి సమక్షంలోనే కంపెనీ హెచ్‌ఆర్ సిబ్బంది ఆ వీడియోను డిలీట్ చేసినట్లు సమాచారం.
ఇది ఒక్కసారే జరిగిన సంఘటన కాకపోవచ్చని పోలీసులు అనుమానిస్తున్నారు. నిందితుడు గతంలో కూడా ఇలాగే ఇతర మహిళలను వీడియో తీసి ఉండవచ్చనే కోణంలో దర్యాప్తు ముమ్మరం చేశారు. ఇందులో భాగంగా, నగేష్ మొబైల్ ఫోన్‌ను స్వాధీనం చేసుకుని, డిలీట్ చేసిన డేటాను తిరిగి పొందేందుకు ఫోరెన్సిక్ ల్యాబ్‌కు పంపించారు. ఫోరెన్సిక్ నివేదిక వస్తే మరిన్ని కీలక విషయాలు బయటకు వచ్చే అవకాశం ఉందని పోలీసు వర్గాలు తెలిపాయి.
