యూట్యూబర్‌గా కెరీర్ ప్రారంభించి అనతికాలంలోనే కోలీవుడ్‌లో స్టార్ డైరెక్టర్‌గా, హీరోగా గుర్తింపు తెచ్చుకున్న అభిషన్ జీవింత్ (27) ఇంట ఆనందోత్సాహాలు వెల్లివిరిశాయి. ఆయన భార్య అఖిల తాజాగా పండంటి ఆడబిడ్డకు జన్మనిచ్చారు. సరిగ్గా వివాహమై ఏడాది పూర్తయ్యే సమయానికి తమ ప్రేమ బంధానికి ప్రతీకగా లక్ష్మీదేవి లాంటి పాపాయి జన్మించడంతో అభిషన్ దంపతులు ఎనలేని సంతోషంలో మునిగితేలుతున్నారు. ఈ శుభవార్త తెలియగానే ఇరు కుటుంబాల్లో సంబరాలు అంబరాన్నంటాయి.
గతేడాది ‘టూరిస్ట్ ఫ్యామిలీ’ సినిమా ప్రమోషన్ల వేదికపైనే అభిషన్ తన చిన్ననాటి స్నేహితురాలు అఖిలకు అందరి ముందూ ప్రపోజ్ చేసి అందరినీ ఆశ్చర్యపరిచారు. అనంతరం పెద్దల అంగీకారంతో గతేడాది అక్టోబర్ 31న వీరి వివాహం ఘనంగా జరిగింది. తాజాగా తన చిట్టి యువరాణిని ప్రేమగా చేతుల్లోకి తీసుకున్న అపురూపమైన ఫొటోను ఇన్‌స్టాగ్రామ్ ద్వారా పంచుకుంటూ “నేను తండ్రినయ్యాను” అని అభిషన్ పెట్టిన ఎమోషనల్ పోస్ట్ ప్రస్తుతం నెట్టింట వైరల్ అవుతోంది. అభిమానులు, సినీ ప్రముఖులు ఈ యువ దంపతులకు పెద్ద ఎత్తున అభినందనలు, శుభాకాంక్షలు తెలియజేస్తున్నారు.
యూట్యూబ్ కంటెంట్ క్రియేటర్‌గా ప్రయాణం ప్రారంభించి దర్శకుడిగా మారిన అభిషన్ జీవింత్, గతేడాది తెరకెక్కించిన ‘టూరిస్ట్ ఫ్యామిలీ’ చిత్రంతో బాక్సాఫీస్ వద్ద సెన్సేషనల్ విజయాన్ని నమోదు చేశారు. ఆ తర్వాత నటి అనస్వర రాజన్‌తో కలిసి ‘విత్ లవ్’ అనే లవ్ స్టోరీతో హీరోగా రంగప్రవేశం చేసి బ్లాక్‌బస్టర్ హిట్‌ను తన ఖాతాలో వేసుకున్నారు. ప్రస్తుతం ఆయన కన్నడ సూపర్‌స్టార్ శివరాజ్ కుమార్‌తో కలిసి ఓ భారీ పాన్-ఇండియా చిత్రంలో స్క్రీన్ షేర్ చేసుకుంటూ కెరీర్‌లో దూసుకుపోతున్నారు.
