తప్పులు సరిదిద్దుకుని సరికొత్త జీవితాన్ని ప్రారంభించాలనే సంకల్పం ఉంటే కఠినమైన జైలు గోడలు సైతం ఉన్నత లక్ష్యాలకు అడ్డంకి కావని తెలంగాణకు చెందిన 10 మంది ఖైదీలు నిరూపించారు. వివిధ కేసుల్లో జైలు శిక్ష అనుభవిస్తూనే డాక్టర్ బీఆర్ అంబేడ్కర్ సార్వత్రిక విశ్వవిద్యాలయం (BRAOU) ద్వారా పీజీ కోర్సులను విజయవంతంగా పూర్తి చేశారు. హైదరాబాద్‌లో అత్యంత వైభవంగా నిర్వహించిన వర్సిటీ 27వ స్నాతకోత్సవ వేదికపై గవర్నర్ చేతుల మీదుగా ఈ ఖైదీలు అధికారికంగా తమ పోస్ట్ గ్రాడ్యుయేషన్ డిగ్రీ పట్టాలను అందుకుని పలువురికి ఆదర్శంగా నిలిచారు.
పట్టాలు అందుకున్న 10 మందిలో ఎనిమిది మంది ఎంఎస్సీ (సైకాలజీ), ఇద్దరు ఎంఏ (సోషియాలజీ) విభాగాల్లో విశేష ప్రతిభ కనబరిచారు. వీరంతా జైలుకు రాకముందే ఎల్‌ఎల్‌బీ, బీటెక్ వంటి సాంకేతిక, న్యాయ కోర్సులతో పాటు వివిధ సాధారణ డిగ్రీలను పూర్తి చేసినవారే. అయితే కారాగారంలో శిక్ష అనుభవిస్తున్న కాలాన్ని వృథా చేయకుండా, మానసిక పరిపక్వతకు దోహదపడే మానసిక శాస్త్రం, సమాజ శాస్త్రం వంటి కీలక సబ్జెక్టులను ఎంచుకుని పట్టుదలతో చదివి పీజీ పూర్తి చేయడం విశేషం.
ఖైదీలు శిక్షా కాలాన్ని కేవలం నిర్బంధంగా భావించకుండా సమయాన్ని నిర్మాణాత్మకంగా మార్చుకునేలా తెలంగాణ జైళ్లు, దిద్దుబాటు సేవల శాఖ అందిస్తున్న ప్రోత్సాహం ఈ విజయానికి ప్రధాన కారణమైంది. ఈ స్నాతకోత్సవ కార్యక్రమానికి జైళ్ల శాఖ డీఐజీ డాక్టర్ డి. శ్రీనివాస్, చర్లపల్లి సెంట్రల్ జైలు సూపరింటెండెంట్ జి. ప్రమోద్ స్వయంగా హాజరై ఖైదీలను అభినందించారు. శిక్ష ముగిసి విడుదలైన తర్వాత వీరు సమాజంలో బాధ్యతాయుతమైన, గౌరవప్రదమైన పౌరులుగా జీవించేందుకు ఈ ఉన్నత విద్య బలమైన పునాదిగా మారుతుందని జైళ్ల శాఖ అధికారులు ధీమా వ్యక్తం చేశారు.
