ఆగ్నేయ బంగాళాఖాతం, దానిని ఆనుకుని ఉన్న దక్షిణ అండమాన్ మీదుగా అల్పపీడన ప్రాంతంగా గుర్తించినట్లు ఏపీ రాష్ట్ర విపత్తుల నిర్వహణ సంస్థ అధికారులు తెలిపారు. ఇది పశ్చిమ-వాయువ్య దిశగా కదిలి అల్పపీడనంగా కేంద్రీకరించే అవకాశం ఉందని చెప్పారు. మంగళవారం సాయంత్రానికి వాయుగుండంగా మారే అవకాశం ఉందన్నారు.
క్రమంగా ఎల్లుండి ఉదయానికి తుఫానుగా మారి.. ఉత్తర తమిళనాడు-పుదుచ్చేరి, దక్షిణకోస్తాంధ్ర ఆంధ్ర తీరాలకు చేరుకునే అవకాశం ఉందని అధికారులు వెల్లడించారు. దీని ప్రభావంతో రాబోయే మూడు రోజుల్లో దక్షిణకోస్తాలోని ప్రకాశం, నెల్లూరు, తిరుపతి, రాయలసీమలోని చిత్తూరు, కడప, అన్నమయ్య జిల్లాల్లో అక్కడక్కడ భారీ వర్షాలు కురిసే అవకాశం ఉందని చెప్పారు.
