గుజరాత్ ముఖ్యమంత్రిగా, అనంతరం భారత ప్రధానమంత్రిగా రాజ్యాంగ అధినేత బాధ్యతల్లో ప్రధాని మోదీ నిరంతరాయంగా 25 ఏళ్లు పూర్తి చేసుకున్న చారిత్రాత్మక సందర్భాన్ని పురస్కరించుకుని టీడీపీ ఈ యాత్రను నిర్వహించింది. తిరుపతి పుణ్యక్షేత్రం నుంచి వారణాసి (కాశీ) వరకు సుమారు 2,000 కిలోమీటర్ల మేర తెలుగుదేశం యువజన విభాగం సాగించిన ఈ భారీ బైక్ యాత్ర అందరి దృష్టినీ ఆకర్షించింది. ఆంధ్రప్రదేశ్‌లోని జీవనదులైన కృష్ణా, గోదావరి పవిత్ర జలాలను సేకరించి, కాశీ విశ్వనాథుని పాదాల చెంత సమర్పించి జలాభిషేకం నిర్వహించడం ఈ ఆధ్యాత్మిక-సామాజిక యాత్ర ముఖ్య ఉద్దేశమని లోకేశ్ గుర్తుచేశారు.
అంతకుముందు ప్రధాని నరేంద్ర మోదీ ‘ఎక్స్’ వేదికగా స్పందిస్తూ.. ఏపీలోని పవిత్ర నదీ జలాలను కాశీ క్షేత్రానికి తీసుకురావడం ద్వారా ప్రజలు, సంస్కృతులు, దేశ సమైక్యతను చాటిచెప్పారని ప్రశంసించారు. దీనికి బదులిచ్చిన లోకేశ్.. “మోదీ గారు అందించిన సుపరిపాలన, 25 ఏళ్ల ప్రజా సేవకు నివాళిగా ఈ యాత్రను ఒక చిన్న కానుకగా భావిస్తున్నాం; ఇది రాష్ట్ర సంప్రదాయాలు, జాతీయ సమగ్రతను ఏకం చేసే పవిత్ర బంధం” అని కొనియాడారు. టీడీపీ శ్రేణుల కృషిని గుర్తించి అభినందించినందుకు యావత్ ఆంధ్రప్రదేశ్ ప్రజల తరఫున ధన్యవాదాలు తెలిపారు.
