ఆంధ్రప్రదేశ్ రాష్ట్రంలోని ప్రభుత్వ పాఠశాలల్లో విద్యార్థులకు అందిస్తున్న మధ్యాహ్న భోజన పథకం అమలు, ఆహార నాణ్యతపై రాష్ట్ర ప్రభుత్వం సమగ్ర సర్వే నిర్వహించింది. ఈ ఏడాది జనవరి నుంచి ఆగస్టు వరకు ఐవీఆర్ఎస్ (IVRS) ఆటోమేటెడ్ ఫోన్ కాల్స్ ద్వారా క్షేత్రస్థాయిలో విద్యార్థులు, వారి తల్లిదండ్రుల నుంచి ప్రత్యక్షంగా ఫీడ్బ్యాక్ సేకరించారు. పాఠశాలల్లో రోజువారీగా వండి వడ్డిస్తున్న భోజనం నాణ్యత, పరిశుభ్రత, మెనూ అమలుపై ప్రజల అభిప్రాయాలను నమోదు చేయగా.. ఈ సర్వే ఫలితాలలో విశాఖపట్నం జిల్లా రాష్ట్రంలోనే ప్రథమ స్థానంలో నిలిచి ప్రత్యేక గుర్తింపు సాధించింది.
ప్రభుత్వ సర్వే నివేదిక ప్రకారం.. విశాఖపట్నం జిల్లాలో పాఠశాల భోజనంపై ఏకంగా 80.8 శాతం మంది తల్లిదండ్రులు, విద్యార్థులు సంపూర్ణ సంతృప్తి వ్యక్తం చేసి ప్రథమ స్థానాన్ని కట్టబెట్టారు. విశాఖ తర్వాతి స్థానాల్లో శ్రీకాకుళం 77.5 శాతం, మన్యం జిల్లా 76.9 శాతం, పోలవరం 76.7 శాతం, విజయనగరం 76.5 శాతం సానుకూల రేటింగ్తో ఉత్తమ పనితీరు కనబరిచాయి. అయితే కొన్ని జిల్లాల్లో సంతృప్తి స్థాయిలు కాస్త తక్కువగా నమోదయ్యాయి. ముఖ్యంగా అనంతపురం జిల్లా 68.2 శాతంతో అత్యల్ప రేటింగ్ పొందగా, కర్నూలు 69.3 శాతం, శ్రీసత్యసాయి జిల్లా 70.2 శాతం, ప్రకాశం మరియు బాపట్ల జిల్లాలు 71.4 శాతం మేర మాత్రమే సంతృప్తిని నమోదు చేశాయి.
బడి పిల్లలకు సమతుల్య, పౌష్టికాహారాన్ని అందించే లక్ష్యంతో చేపట్టిన ఈ ఐవీఆర్ఎస్ సర్వే ద్వారా ఏయే జిల్లాల్లో భోజన నాణ్యత మరింత మెరుగుపడాలనే దానిపై విద్యాశాఖ అధికారులకు స్పష్టమైన కార్యాచరణ లభించింది. ముఖ్యంగా 70 శాతంలోపు లేదా అంతకంటే తక్కువ సానుకూలత నమోదైన రాయలసీమ జిల్లాలపై ప్రత్యేక దృష్టి సారించాలని ప్రభుత్వం నిర్ణయించింది. పాఠశాలల్లో విద్యార్థులందరికీ మరింత రుచికరమైన, పరిశుభ్రమైన మరియు నాణ్యతా ప్రమాణాలతో కూడిన భోజనాన్ని రోజూ అందించేలా క్షేత్రస్థాయి పర్యవేక్షణను అధికారులు ముమ్మరం చేస్తున్నారు.
