విజయనగరం జిల్లా గరివిడిలోని వైకాపా కార్యాలయంలో నిర్వహించిన పార్టీ నేతలు, కార్యకర్తల ఆత్మీయ సమావేశంలో తీవ్ర భావోద్వేగ వాతావరణం నెలకొంది. ఈ సమావేశానికి ముఖ్య అతిథిగా హాజరైన మాజీ మంత్రి, శాసనమండలి ప్రతిపక్ష నేత బొత్స సత్యనారాయణ ప్రసంగిస్తున్న సమయంలో ఒక్కసారిగా కంటతడి పెట్టారు. గతంలో పార్టీ అభివృద్ధి కోసం కార్యకర్తలతో కలిసి నడిచిన రోజులను, ఉద్యమ జ్ఞాపకాలను గుర్తు చేసుకుంటూ ఆయన తీవ్ర ఆవేదనకు గురికావడంతో, సభలో ఉన్న పలువురు స్థానిక నాయకులు, కార్యకర్తలు సైతం భావోద్వేగానికి లోనై కన్నీరు పెట్టుకున్నారు.
ఈ సమావేశంలో జిల్లా పరిషత్ చైర్మన్, వైకాపా జిల్లా అధ్యక్షుడు మజ్జి శ్రీనివాసరావు (చిన్న శ్రీను) ఇటీవల వైకాపాను వీడి తెదేపాలో చేరిన అంశం ప్రధానంగా ప్రస్తావనకు వచ్చింది. బొత్స సొంత మేనల్లుడైన చిన్న శ్రీనుతో తమకున్న సుదీర్ఘ రాజకీయ అనుబంధాన్ని కేడర్ గుర్తుచేసుకుంది. కొన్నాళ్లుగా బొత్స సత్యనారాయణ, చిన్న శ్రీను మధ్య సాగుతున్న అంతర్గత విభేదాలు, పార్టీలో ప్రాధాన్యం తగ్గించే ప్రయత్నాలు జరిగాయన్న ప్రచారాల నేపథ్యంలోనే ఆయన తెదేపా తీర్థం పుచ్చుకున్నట్లు వార్తలు వచ్చాయి. కుటుంబంలో, పార్టీలో కీలకమైన వ్యక్తి దూరమవడం బొత్సను తీవ్రంగా కలిచివేసినట్లు స్పష్టమైంది.
ఉత్తరాంధ్రలో స్థానిక సంస్థల ఎన్నికలు సమీపిస్తున్న తరుణంలో చిన్న శ్రీను పార్టీ మారడం వైకాపాకు కోలుకోలేని దెబ్బగా రాజకీయ విశ్లేషకులు భావిస్తున్నారు. విజయనగరం జిల్లావ్యాప్తంగా బలమైన క్యాడర్ను నిర్మించుకున్న చిన్న శ్రీను.. గత జడ్పీటీసీ ఎన్నికల్లో వైకాపా 34 మండలాలను కైవసం చేసుకోవడంలో, 400కు పైగా ఎంపీటీసీలు, 800కు పైగా పంచాయతీలను గెలవడంలో ప్రధాన పాత్ర పోషించారు. ఇప్పుడు ఆయన బాటలోనే ద్వితీయ శ్రేణి నాయకత్వం కూడా తెదేపా వైపు మొగ్గుచూపితే జిల్లాలో వైకాపా సంస్థాగతంగా తీవ్ర నష్టాన్ని మూటగట్టుకోవాల్సి వస్తుందని పార్టీ వర్గాల్లో తీవ్ర ఆందోళన వ్యక్తమవుతోంది.
