తాడిమర్రి( yes9tv )40 శాతం రాయితీపై వేరుశనగ విత్తనాల పంపిణీ ప్రారంభం
రైతులు సద్వినియోగం చేసుకోవాలని అధికారుల సూచన
తాడిమర్రి, జూన్ 24:
తాడిమర్రి మండలంలో వ్యవసాయ శాఖ ఆధ్వర్యంలో 40 శాతం రాయితీపై వేరుశనగ విత్తనాల పంపిణీ కార్యక్రమాన్ని ప్రారంభించారు. ఈ కార్యక్రమాన్ని ప్రజాప్రతినిధులు, రైతు సోదరులు, మహిళా రైతులు, మండల రెవెన్యూ అధికారి (ఎంఆర్వో), మండల పరిషత్ అభివృద్ధి అధికారి (ఎంపీడీవో), మండల వ్యవసాయ అధికారి సమక్షంలో ప్రారంభించారు.
ఈ సందర్భంగా అధికారులు మాట్లాడుతూ, ఇప్పటికే రిజిస్ట్రేషన్ చేసుకున్న రైతులు తమ అవసరాలకు అనుగుణంగా మండల కేంద్రంలోని రైతు సేవా కేంద్రాన్ని సంప్రదించి రాయితీ విత్తన వేరుశనగ కాయలను పొందవచ్చని తెలిపారు. ఇంకా రిజిస్ట్రేషన్ చేయించుకోని రైతులు కూడా త్వరితగతిన నమోదు చేసుకుని ఈ ప్రభుత్వ రాయితీ పథకాన్ని సద్వినియోగం చేసుకోవాలని సూచించారు.
మండలంలోని 10 రైతు సేవా కేంద్రాల్లో వేరుశనగ విత్తనాలను రైతులకు అందుబాటులో ఉంచినట్లు అధికారులు వెల్లడించారు. రైతులు ఆలస్యం చేయకుండా సమీప రైతు సేవా కేంద్రం సిబ్బందిని సంప్రదించి నమోదు ప్రక్రియ పూర్తి చేసుకుని రాయితీపై విత్తనాలను పొందాలని కోరారు.
వ్యవసాయ ఉత్పత్తి పెంపు, రైతుల సాగు వ్యయ భారం తగ్గింపే ఈ కార్యక్రమం ప్రధాన లక్ష్యమని అధికారులు పేర్కొన్నారు.
