తమిళనాడు అసెంబ్లీ ఎన్నికల ఫలితాల్లో నటుడు విజయ్ నేతృత్వంలోని టీవీకే (TVK) పార్టీ అనూహ్య విజయాల దిశగా దూసుకుపోతున్న తరుణంలో, నీలాంకరైలోని ఆయన నివాసానికి ప్రముఖ నటి త్రిష చేరుకోవడం ఇప్పుడు పెను సంచలనంగా మారింది. ఈ ఉదయం తిరుమల శ్రీవారిని దర్శించుకుని వచ్చిన త్రిష, నేరుగా విజయ్ ఇంటికి వెళ్లడం రాజకీయంగానూ, సినీ పరంగానూ ప్రాధాన్యత సంతరించుకుంది. విజయ్ సాధిస్తున్న చారిత్రక విజయం నేపథ్యంలో ఆయనను వ్యక్తిగతంగా అభినందించేందుకే ఆమె వచ్చినట్లు తెలుస్తోంది.
గత కొంతకాలంగా విజయ్ రాజకీయ ప్రస్థానానికి త్రిష సోషల్ మీడియా వేదికగా పరోక్షంగా మద్దతు తెలుపుతూనే ఉన్నారు. నేడు వెలువడుతున్న ఫలితాల్లో టీవీకే పార్టీ కీలక శక్తిగా అవతరిస్తుండటంతో, వారిద్దరి భేటీపై సర్వత్రా ఆసక్తి నెలకొంది. వీరిద్దరి మధ్య ఉన్న సాన్నిహిత్యం దృష్ట్యా, ఈ కలయిక కేవలం మర్యాదపూర్వకమైనదా లేక భవిష్యత్తులో విజయ్ రాజకీయ ప్రయాణంలో త్రిష కూడా భాగస్వామి కాబోతున్నారా అన్న చర్చ తమిళ రాజకీయ వర్గాల్లో జోరుగా సాగుతోంది.
