అతను చనిపోలేదు.. సమాజమే చంపేసింది! సోషల్ మీడియా ప్రపంచంలో తనదైన అమాయకత్వంతో, వింత కామెడీతో కోట్లాది మందిని నవ్వించిన ‘అగ్గిపెట్టి మచ్చ’ అలియాస్ కిరణ్ కుమార్ ఇక లేరు. అనారోగ్యంతో తిరుపతిలోని సిమ్స్ ఆసుపత్రిలో చికిత్స పొందుతూ ఆయన కన్నుమూశారు. ఒక మనిషి మరణం ముందు మనం ఆగిపోవాలి.. అతని జీవితాన్ని, ముఖ్యంగా సోషల్ మీడియాలో అతని విషాద ప్రయాణాన్ని ఒక్కసారి వెనక్కి తిరిగి చూడాలి.
లైకులు కావాలి.. వ్యూస్ కావాలి.. వీడియో వైరల్ కావాలి! ఈ పిచ్చి పోటీ ఎంత దిగజారిపోయిందో చెప్పడానికి కిరణ్ కుమార్ జీవితమే ఒక సజీవ సాక్ష్యం. కనీసం తన పరిస్థితిని అర్థం చేసుకునే స్థితిలో కూడా లేని ఒక అమాయకుడిని కెమెరాల ముందు కూర్చోబెట్టారు. వందో, రెండొందల రూపాయలు చేతిలో పెట్టి.. బలవంతంగా మద్యం తాగించి.. నోటి వెంట బూతులు రప్పించి ఇంటర్వ్యూలు చేశారు. ఆ వీడియోల వల్ల ఛానళ్లకు వ్యూస్ వచ్చాయి, పేజీలకు లక్షల్లో కంటెంట్ వచ్చింది. కానీ, ఆ కంటెంట్‌తో సంపాదించిన కోట్లాది రూపాయల్లో.. ఆ పేదవాడికి దక్కింది ఎంత? అతని కుటుంబానికి చేరింది ఎంత?
(విజువల్స్ చేంజ్: కిరణ్ కుమార్ అనారోగ్యంతో ఉన్న ఫోటోలు, హాస్పిటల్ బెడ్ పై ఉన్న దృశ్యాలు)
ఒక మనిషి బలహీనతను మనం కంటెంట్‌గా మార్చుకున్నప్పుడు.. మనం అతనికి సహాయం చేస్తున్నామా? లేక అతని పరిస్థితిని మరింత దిగజారుస్తున్నామా? కిరణ్ కుమార్ పాపులర్ అయిన రోజుల్లో అతని చుట్టూ వందల కెమెరాలు తిరిగాయి. కానీ, అదే సమయంలో అతని ఆరోగ్యం ఎలా ఉంది? అతని కుటుంబం ఏ స్థితిలో ఉంది? అతని భవిష్యత్తు ఏంటి? అనే ప్రశ్నలు ఏ ఒక్క కెమెరాకూ కనిపించలేదు. నవ్వించడం కోసం అతన్ని రెచ్చగొట్టారు.. చివరికి ఒక మంచి వ్యక్తిని మతిస్థిమితం లేని వాడిగా, బూతులు మాట్లాడే వ్యక్తిగా సమాజంలో ముద్ర వేశారు. వ్యూస్ కోసం అతని జీవితాన్నే కొందరు తమ చేతుల్లోకి తీసుకున్నారు.
కానీ ఇప్పుడు కిరణ్ కుమార్ లేరు. మిగిలింది కేవలం అతని వీడియోలు.. అతన్ని చూసి నవ్విన జ్ఞాపకాలు.. ఇంకా సమాధానం లేని కొన్ని చేదు ప్రశ్నలు మాత్రమే! అతని జీవితాన్ని కంటెంట్‌గా మార్చుకుని బతికిన వాళ్లలో.. ఎంతమంది అతని చివరి రోజుల్లో పక్కన నిలబడ్డారు? అతని ఆరోగ్యం గురించి ఎంతమంది ఆలోచించారు? ఇప్పుడతని కుటుంబానికి ఎవరు సమాధానం చెబుతారు?
మనకు ఎవరి జీవితంలోనూ హీరో కావాల్సిన అవసరం లేదు.. కనీసం ఇలాంటి విలన్లుగా మారకపోతే చాలు. అందరి సంతోషం కోసం.. కొందరి స్వార్థం కోసం తన ఆరోగ్యాన్ని, జీవితాన్ని త్యాగం చేసిన అగ్గిపెట్టి మచ్చా.. ‘మిస్ యూ’. నీ ఆత్మకు శాంతి చేకూరాలని కోరుకుంటూ…
