దేశవ్యాప్తంగా నిత్యం కోట్లాది మంది ప్రజలు వినియోగించే యూపీఐ (UPI) డిజిటల్ చెల్లింపులపై రుసుములు వసూలు చేయనున్నారంటూ వస్తున్న వార్తలపై నేషనల్ పేమెంట్స్ కార్పొరేషన్ ఆఫ్ ఇండియా (NPCI) కీలక స్పష్టతనిచ్చింది. వ్యక్తుల మధ్య జరిగే (P2P – Person to Person) లావాదేవీలతో పాటు రూపే (RuPay) డెబిట్ కార్డుల ద్వారా జరిపే చెల్లింపులపై ఎలాంటి అదనపు ఛార్జీలు విధించడం లేదని, అవి ఎప్పటిలాగే పూర్తిగా ఉచితంగానే కొనసాగుతాయని స్పష్టం చేసింది. సామాన్యులు, రోజువారీ వినియోగదారులకు ఎలాంటి ఇబ్బంది కలగకుండా ఉచిత డిజిటల్ సేవలు యథావిధిగా అందుబాటులో ఉంటాయని తెలిపింది.
ఇక వినియోగదారులు, వ్యాపారుల మధ్య జరిగే (P2M – Person to Merchant) లావాదేవీల్లో దాదాపు 96 శాతం లావాదేవీలు పూర్తిగా ఉచితంగానే సాగుతున్నాయని ఎన్పీసీఐ వివరించింది. ప్రభుత్వ సేవల కోసం ఆన్లైన్ ద్వారా రూ.2,000 వరకు జరిపే ఎలాంటి డిజిటల్ చెల్లింపులపైనా రూపాయి కూడా రుసుము వసూలు చేయడం లేదని స్పష్టం చేసింది. సాధారణ ప్రజలు, చిరు వ్యాపారులు రోజువారీగా జరిపే చిన్న మొత్తాల లావాదేవీలపై ఎటువంటి ఆర్థిక భారం పడదని తేల్చిచెప్పింది.
అయితే, ప్రభుత్వ సేవలకు సంబంధించి రూ.2,000 కంటే ఎక్కువ మొత్తంతో చేసే లావాదేవీలపై మాత్రమే కేవలం రూ.5 చొప్పున మెర్చంట్ డిస్కౌంట్ రేట్ (MDR) వర్తిస్తుందని సంస్థ పేర్కొంది. మన దేశీయ డిజిటల్ చెల్లింపుల వ్యవస్థను సాంకేతికంగా మరింత పటిష్టం చేయడంతో పాటు, భారతీయ ఫిన్టెక్ రంగంలోకి మరిన్ని పెట్టుబడులను ప్రోత్సహించేందుకే ఈ నామమాత్రపు ఎమ్డీఆర్ విధానాన్ని అమలు చేస్తున్నట్లు స్పష్టం చేసింది. ఎన్పీసీఐ ఇచ్చిన ఈ వివరణతో యూపీఐ సేవలపై సామాజిక మాధ్యమాల్లో వ్యాపిస్తున్న ఊహాగానాలకు తెరపడింది.
