నల్గొండ జిల్లాకు చెందిన ఒక యువకుడు అమెరికాలో గుండెపోటుతో ఆకస్మికంగా మరణించడం స్థానికంగా తీవ్ర విషాదాన్ని నింపింది. నల్గొండ మండలం మేళ్లదుప్పలపల్లి గ్రామానికి చెందిన పవన్ కుమార్ రెడ్డి (24), ఉన్నత చదువుల నిమిత్తం రెండేళ్ల క్రితం అమెరికాకు వెళ్ళాడు. శుక్రవారం రాత్రి వరకు స్నేహితులతో సరదాగా గడిపిన పవన్, శనివారం తెల్లవారుజామున ఒక్కసారిగా గుండెపోటుకు గురై కుప్పకూలిపోయాడు. స్నేహితులు ఆసుపత్రికి తరలించేలోపే అతను ప్రాణాలు కోల్పోయాడు.
పవన్ కుమార్ రెడ్డి ప్రస్తుతం అమెరికాలో ఎంఎస్ (MS) చివరి సెమిస్టర్ చదువుతున్నాడు. మరో రెండు నెలల్లో తన చదువు పూర్తి చేసుకుని, ఉన్నత శిఖరాలను అధిరోహిస్తాడని ఆశించిన కుటుంబానికి ఈ వార్త పిడుగులా తగిలింది. చదువుకుంటూనే ఒక కంపెనీలో పార్ట్ టైమ్ ఉద్యోగం చేస్తూ తల్లిదండ్రులకు ఆసరాగా ఉంటున్న పవన్, చిన్న వయస్సులోనే గుండెపోటుతో మరణించడం అందరినీ దిగ్భ్రాంతికి గురిచేసింది.
పవన్ మరణవార్త తెలియగానే మేళ్లదుప్పలపల్లి గ్రామంలో విషాద ఛాయలు అలుముకున్నాయి. చేతికి అందిన కొడుకు విగతజీవిగా మారాడన్న వార్త విన్న తల్లిదండ్రులు కన్నీరుమున్నీరవుతున్నారు. పవన్ కుమార్ రెడ్డి మృతదేహాన్ని స్వగ్రామానికి తీసుకురావడానికి తగిన ఏర్పాట్లు చేయాలని, ప్రభుత్వం మరియు ఎన్నారై సంఘాలు సహకరించాలని కుటుంబ సభ్యులు, గ్రామస్తులు కోరుతున్నారు.
